Argentınadaǵy sherý kezinde 150 adam ustaldy

ASTANA. KAZINFORM — Býenos-Aırestiń ortalyǵyndaǵy narazylyq aktsııasy kezinde polıtsııa 150 adamdy ustady. Bul týraly Argentına qaýipsizdik mınıstri Patrısııa Býllrıch LN+ telearnasyna bergen suhbatynda aıtty, dep jazady Report.

Onyń aıtýynsha, 15-17 polıtsııa qyzmetkeri jaraqat alǵan.

— Bul demonstratsııaǵa kelgen adamdardyń kópshiligi — jankúıerler, qalǵandary — óltirýge daıyn bolyp kelgender, — dedi ol.

Aıta keteıik, 12 naýryzda Argentına astanasynyń ortalyǵynda kongress ǵımaratynyń janynda narazylyq sherýi ótken. Oǵan turmys jaǵdaıyn jaqsartýdy talap etken zeınetkerler men olardy qoldaýǵa kelgen fýtbol jankúıerleri qatysqan. 

Alań men onyń mańyndaǵy kóshelerge jınalǵan eki myńǵa jýyq adam zeınetaqynyń azdyǵy men kúnkóristiń qymbattyǵyna narazylyqtaryn bildirgen.

Sherýge kelgender birden polıtsııamen qaqtyǵysyp ketken, jaǵdaı kóp uzamaı tártipsizdikterge ulasqan. Jastar tártip saqshylaryna taıaq, bótelke, tas laqtyrǵan.

Polıtsııa kózden jas aǵyzatyn gaz qoldanyp, sý shashqan. Sherýshiler tosqaýyldar qoıyp, polıtsııa kóligi men qoqys jáshikterin órtep jibermek bolǵan.

Aıta keteıik, buǵan deıin Argentınada sý tasqynynan 16 adam qaza tapqanyn habarlaǵan edik.