Argentınada vandaldar Messıdiń eki aıaǵyn «syndyryp ketti»
ASTANA. QazAqparat -Argentına quramasyn 2018 jylǵy Álem chempıonatyna jalǵyz ózi súırep shyǵarǵan Lıonel Messıdiń Býenos-Aırestegi músini taǵy qıratyldy. Bul jaıly dúısenbi kúni «Eýrosport» habarlady.
Argentına quramasy men «Barselonanyń» shabýylshysy Lıonel Messıdiń Býenos-Aırestiń Pýerto-Madero aýdanyndaǵy músini 2017 jyldyń qańtarynda da vandaldardyń shabýylyna ushyraǵan bolatyn. Ol kezde buzaqylar eskertkishti qaq ortasynan bólip ketse, bul joly fýtbolshynyń eki aıaǵyn "syndyrǵan".
Aıta keteıik, Messı bes dúrkin «Altyn dop» ıegeri atanǵan álemdegi jalǵyz fýtbolshy. Degenmen, bul rekordyn 7 jeltoqsan kúni Krıshtıaný Ronaldýmen bólisýi múmkin.
