Argentınada teńiz kóligi qyzmetkerleri eńbek reformasyna qarsy ereýilge shyqty

ASTANA. KAZINFORM — Argentınada teńiz kóligi salasynyń qyzmetkerleri 48 saǵattyq ereýilge shyqty. Bul narazylyq sharasy júk kemeleriniń qozǵalysyna jáne eldiń porttyq ınfraqurylymynyń jumysyna áser ete bastady. Bul týraly Reuters-ke silteme jasap, Belta agenttigi habarlady.

Ereýil prezıdent Haver Mıleı usynǵan eńbek reformasy týraly zań jobasyna qarsylyq retinde uıymdastyryldy. Atalǵan bastama argentınalyq kásipodaqtardyń qatań synyna ushyrady. Olardyń pikirinshe, usynylyp otyrǵan ózgerister jumysshylardyń qoldanystaǵy áleýmettik kepildikterin álsiretedi.

Ereýilge baılanysty kommertsııalyq kemelerge júk tıeý-túsirý jumystary jáne basqa da qyzmetter toqtap tur. Ásirese, aýyl sharýashylyǵy ónimderin eksporttaıtyn álemdegi iri ortalyqtardyń biri sanalatyn Rosarıo port aımaǵynda irkilister aıqyn sezilýde. Port bıznesiniń ókilderi keıbir kemeler qyzmet kórsetý shekteýlerine baılanysty jóneltilýin keıinge qaldyrýy múmkin ekenin aıtady.

Eńbek reformasy týraly zań jobasyn Argentına senaty maquldaǵan. Qujatta jumystan shyǵý járdemaqysyn tóleý tártibin ózgertý, jyl saıynǵy demalysty keminde jeti kúnnen bólip berý múmkindigi, sondaı-aq jalaqyny qolma-qol emes esep aıyrysý arqyly ulttyq nemese shetel valıýtasynda tóleý qarastyrylǵan.

Sonymen qatar, zań jobasy jumys berýshiler úshin ıkemdilikti arttyrýǵa baǵyttalǵan. Atap aıtqanda, eńbek daýlary boıynsha sotqa júginý negizderi qysqartylyp, ereýil ótkizý quqyǵyna shekteýler engiziledi.

Budan bólek, «saǵat qory» dep atalatyn júıeni qurý usynylǵan. Bul júıe boıynsha qajet bolǵan jaǵdaıda qyzmetker jumys ornynda qosymsha birneshe saǵat qalyp, esesine keıinirek kóbirek demalys saǵatyn ala alady.

Aıta keteıik, AQSh-ta shamamen 15 myń medbıke ereýilge shyqqan edi.