Argentınada órt sóndirý tikushaǵy apatqa ushyrap, 7 adam kóz jumdy
ASTANA. KAZINFORM — Argentınanyń San-Hýan provıntsııasynda orman órtin sóndirýge paıdalanylǵan tikushaq apatqa ushyrap, 7 adam qaza tapty, dep habarlaıdy Report.
Bul týraly Argentınanyń Tótenshe jaǵdaılar jónindegi federaldyq agenttigi men aımaq úkimeti málimdegen.
— Búgin tańerteń Tótenshe jaǵdaılar jónindegi federaldyq agenttik jalǵa alǵan Bell 412 tikushaǵy San-Hýan provıntsııasyndaǵy Ischıgýalasto saıabaǵy mańynda apatqa ushyrady, — delingen vedomstvo habarlamasynda.
Agenttik málimetinshe, tikushaq orman órtin sóndirýge kómektesý úshin La-Rıoha provıntsııasyna baǵyt alǵan. Apat bolǵan jerdi basqa áýe kemesi anyqtaǵan.
Qaıǵyly oqıǵanyń sebepteri anyqtalyp jatyr.
Aıta keteıik, Túrkııanyń Antalııa jáne Mýgla provıntsııalarynyń birneshe aýdanynda orman órti sóndirilip jatyr. Órtti aýyzdyqtaýǵa ushaqtar men júzdegen adam jumyldyryldy.
