Argentınada orman órtine baılanysty myńdaǵan týrıst evakýatsııalandy

ASTANA. KAZINFORM - Elge týrıster aǵylyp keletin ýaqytta ońtústikargentınalyq Patagonııa óńiri aýqymdy órtterden zardap shegip otyr, dep habarlaıdy BILD.

Keıingi kúnderi órt 15 myń gektar aýmaqty kúıdirip jiberdi. Qazirgi ýaqytqa deıin shamamen 3 myń týrıst qaýipsiz jerge kóshirilgen.

Chýbýt provıntsııasynyń gýbernatory Ignasıo Torres Radio Mitre radıostantsııasyna bergen suhbatynda bul jaǵdaıdy óńir tarıhyndaǵy eń aýyr ekologııalyq daǵdarystardyń biri dep baǵalady, dep jazady BILD.

Onyń aıtýynsha, orman órtteri jyl saıyn qaıtalanǵanymen, bıyl árbir órt oshaǵy burynǵydan áldeqaıda jyldam tarap, olardy baqylaý qıyn soǵyp otyr. Sonymen qatar aımaqta 1965 jyldan bergi eń kúshti qurǵaqshylyq bolyp jatyr. 

Jergilikti BAQ-tarǵa súıengen BILD málimetinshe, eń qatty zardap shekken óńirler — Chýbýt pen Rıo-Negro provıntsııalary. Órt oshaqtary Pýerto-Patrıada, Epýıen, El-Oıo, El-Bolson, sondaı-aq Los-Alerses ulttyq parkinde jáne basqa da birqatar aýmaqta tirkelgen.

— Qazir órtpen 500-den astam órt sóndirýshi men polıtsııa qyzmetkeri kúresip jatyr, avıatsııa da jumyldyrylǵan. Bir órt sóndirýshiniń aýyr kúıikpen aýrýhanaǵa túskeni habarlandy. Bir aptadan beri bolyp jatqan oqıǵalardyń naqty sebebi ázirge belgisiz, — dep jazady basylym.

Sonymen birge gýbernator Torres órttiń qasaqana qoıylǵanyn meńzeıtin belgiler bar ekenin aıtyp, tergeýge kómektesetin aqparat úshin 50 mıllıon peso (shamamen 29 myń eýro) kóleminde syıaqy taǵaıyndalǵanyn málimdedi.

Osyǵan deıin aptap ystyqtyń saldarynan Aýstralııada 300 myń gektardan astam orman órtke oranǵany týraly jazdyq.