Argentınada qysqartýlarǵa qarsy narazylyq sherýi ótti
ASTANA. QazAqparat - Argentına astanasy Býenos-Aıreste myńdaǵan adam jınalyp, el prezıdenti Maýrısıo Makrı ustanǵan saıasatqa qarsylyq bildirdi, dep jazady «Habar 24».
Narazylyq sherýge shyqqandar jaǵdaıdyń kún sanap tómendep bara jatqanyn alǵa tartyp otyr. Olar bılikten jappaı qysqartýdy doǵaryp, jalaqyny kóbeıtip, azyq-túlik baǵasyn turaqty etýin talap etti.
Jumysshylar kásipodaǵy uıymy basshysynyń aıtýynsha, sońǵy bir jyl ishinde 1 mln 300 myń adam taqyr kedeıge aınalǵan.
Bılik saıasatyna syrttan kelgen mıgranttar da narazy. Olar prezıdenttiń bosqyndardy elden shyǵarý úderisine ózgeris engizýge baǵyttalǵan jańa jarlyǵyna kóńilderi tolmaıdy.
«Parlament depýtattarynyń aıtýynsha mıgranttardyń barlyǵy alaıaq. Olar jergilikti turǵyndarǵa tıesili jumys oryndaryn tartyp alyp jatyr. Biraq bári de olar oılaǵandaı emes. Biz adal eńbek etip, el ekonomıkasynyń damýyna eleýli úles qosyp júrgen jandarmyz», - deıdi Argentınada turatyn Meksıka azamattary assambleıasynyń ókili Lılıana Chaves.
