Argentınada kedeılik shegi 20 jyldaǵy eń joǵary deńgeıge jetti

ASTANA. KAZINFORM —Qańtarda Argentınada kedeıshilik deńgeıi kúrt ósip, 57,4%-ǵa jetti, bul sońǵy 20 jyldaǵy eń joǵary kórsetkish.  

Argentına Katolık Ýnıversıtetiniń zertteýine sáıkes, Argentınada 27 mıllıonǵa jýyq adam kedeı, olardyń 15 paıyzy kedeılik sheginen tómen jáne azyq-túlik qajettilikterin qanaǵattandyra almaıdy.

Qańtardaǵy kedeıliktiń artýy prezıdent Haver Mıleı 10 jeltoqsanda qyzmetine kiriskennen keıin kóp uzamaı argentına pesosynyń qunsyzdanýyna baılanysty boldy. Bul eldiń negizgi azyq-túlik qorjynyna, sondaı-aq qyzmetter men azyq-túlik emes taýarlarǵa baǵanyń ósýine ákeldi.

Zertteýde jumysshy otbasylar men áleýmettik baǵdarlamalardan járdemaqy almaıtyn orta taptyń kóp zardap shekkeni atalyp ótken.

Zertteýshi Edýardo Donza baǵanyń kóterilýi argentınalyqtarǵa keri áserin tıgizetinin jáne kedeılik naýryz aıynyń shamasynda el halqynyń kem degende 60%-yna áser etetinin aıtty.

Argentınanyń jyldyq ınflıatsııa deńgeıi 2023 jyldyń jeltoqsanynda 211%-dan asyp, Latyn Amerıkasyndaǵy ondaǵan jyldardaǵy eń joǵary deńgeıge jetkeni habarlanǵan bolatyn.