Argentınada Gıtlerdiń qoly qoıylǵan qujattar tabyldy

ASTANA. KAZINFORM — Argentına Joǵarǵy soty ornalasqan Býenos-Aırestegi burynǵy ádilet mınıstrliginiń jertólesinen Germanııadaǵy natsıstik rejımniń 1930-1940 jyldardaǵy qyzmetine qatysty júzdegen qujattary bar jáshikter tabyldy, dep habarlaıdy Clarin.

Qujattar Joǵarǵy Sot murajaıy úshin jertóleni jóndeý jáne daıyndaý kezinde kezdeısoq tabylǵan. Olar tekserilgennen keıin Býenos-Aırestegi Holokost murajaıyna jiberiledi.

Málimetterge sáıkes, qaǵazdar Ádilet mınıstrliginiń jertólesindegi 12 aǵash shampan jáshiginde saqtalǵan. Qujattardyń ishinde tólqujat, partııa bıletteri, úgit-nasıhat materıaldary, aq-qara fotosýretter, paraqshalar, dápterler bar. Keıbir qujattarda Adolf Gıtlerdiń qoly da kezdesedi.

Bul olja 1941 jyly maýsymda Nan-a-Maru kemesimen Tokıodaǵy Germanııa elshiliginen Argentınaǵa jetkizilgen 83 jáshik qujattardyń bir bóligi bolýy múmkin ekeni atap ótildi. Qazirgi ýaqytta muraǵatty Holokost murajaıynyń mamandary men tergeýshileri zerttep jatyr.

Olardyń mindeti - qujattardyń tarıhı mańyzdylyǵyn baǵalaý jáne olarda búkil álem boıynsha natsıstik «aqsha iziniń» buryn belgisiz aspektilerine jaryq túsirýge kómektesetin mańyzdy aqparat bar-joǵyn anyqtaý.

Eske sala keteıik, Argentına parlamenti prezıdentke qatysty janjaldy tergeý úshin komıssııa quratyny jaıly jazǵan edik.