Argentınada Dımashtyń qurmetine mýzykalyq kabınet ashyldy
ASTANA. KAZINFORM — Argentınadaǵy Dımash Qudaıbergenniń jankúıerleri mýzykalyq aspaptarǵa muqtaj bilim berý uıymdaryn qoldaýǵa baǵyttalǵan jańa qaıyrymdylyq bastamaǵa muryndyq boldy. Bul týraly Dimashnews.com saıty jazdy.
Jobanyń maqsaty — balalarǵa mýzykamen aınalysýǵa múmkindik berý, olardyń shyǵarmashylyq áleýetin ashý jáne ózge elderdiń mádenıetimen tanystyrý.
Atalǵan aktsııanyń alǵashqy nysandarynyń biri Mar-del-Plata qalasyndaǵy general Hose de San-Martın atyndaǵy № 5 bastaýysh mektep boldy. Mýzykalyq aspaptardy tabystaý maqsatynda jankúıerler qaýymdastyǵynyń qatysýshylary 400 kılometrden astam qashyqtyqty eńserdi.
Іs-shara aıasynda oqýshylarǵa, ata-analarǵa jáne pedagogterge arnalǵan merekelik baǵdarlama uıymdastyrylyp, onda qonaqtar Dımash Qudaıbergenniń shyǵarmashylyq joly týraly baıandap, qatysýshylardy Qazaqstannyń mádenıeti men dástúrlerimen tanystyrdy. Sonymen qatar, mektepte ulttyq kıimder, aqparattyq materıaldar jáne tanystyrylym stendteri qoıylǵan taqyryptyq kórme ashyldy.
— Bul kúnniń eń áserli sátteriniń biri — mektep ákimshiliginiń mýzykalyq kabınetti Dımash Qudaıbergenniń qurmetine ataý týraly sheshimi boldy. Bul — sırek ári sımvoldyq oqıǵa, sebebi Argentınadaǵy bilim berý mekemelerinde ádette ataqty tulǵalardyń esimderi qaıtys bolǵannan keıin beriledi. Atalǵan jaǵdaıda ónerpazdyń halyqaralyq mádenıetke qosqan úlesin moıyndaý belgisi retinde erekshe sheshim qabyldandy, — dep jazdy saıt.
Uıymdastyrýshylardyń málimdeýinshe, bul bastama eldiń ózge de bilim berý uıymdarynda jalǵasyn tabady. Olardyń pikirinshe, mýzyka adamdardy biriktirip, balalardy shabyttandyryp, halyqtar arasyndaǵy mádenı baılanysty nyǵaıta alady.
Joba Argentınadaǵy Dımash Qudaıbergen jankúıerleri men «La Era Dimash» komandasynyń qoldaýymen júzege asyryldy. Kezdesý sońynda mektep ókilderi qatysýshylarǵa alǵys hattar men estelik syılyqtar tabystady.
Buǵan deıin Ispanııada Dımash pen jankúıerleri týraly derekti fılmniń premerasy ótetinin jazdyq.
Aıta keteıik, Dımash Nurjas Sadyrbaevpen jańa joba bastady.