Argentınada COVID-19 vırýsyn juqtyrýdyń alǵashqy jaǵdaıy tirkeldi
BÝENOS-AIRES. QazAqparat – Argentına Densaýlyq saqtaý mınıstrligi el aýmaǵynda COVID-19 vırýsyn juqtyrýdyń alǵashqy jaǵdaıy tirkelgenin málim etti. Vırýs jeksenbi kúni Mılannan Alitalia áýe kompanııasynyń tikeleı reısimen ushyp kelgen 40 jastaǵy er adamnan tabyldy, dep habarlaıdy QazAqparat Buenos Aires Times-qa silteme jasap.
Er adam Ispanııa men Vengrııada bolǵan. Elge kelgende odan eshqandaı aýrý belgileri baıqalmaǵan.
Jeksenbi kúni keshke er adamnyń dene qyzýy kóterilip, syrqat belgi bere bastaǵan. Ol Býenos-Aırestaǵy Swiss Clinic and Maternity Hospital jeke klınıkasyna karantınge ornalastyryldy. Malbran medıtsınalyq zertteýler zerthanasy jelisiniń fılıaly onyń koronavırýs juqtyrǵanyn rastady.
Úkimetke ushaqta onyń janynda otyrǵan jolaýshylar týraly eskertildi. Jergilikti organdardyń málimetinshe, olar tekserýden ótedi.
Densaýlyq saqtaý mınıstrliginiń qyzmetkeri Karla Vızzotı dúısenbi kúni COVID-19 vırýsyn erte anyqtaý óte mańyzdy ekenin atap ótti. Álem boıynsha koronavırýsqa 89 myń adam shaldyǵyp, 3 myń adam kóz jumdy.
Aýrý juqtyrý jaǵdaılary Ońtústik jáne Soltústik Amerıkanyń basqa da elderinde rastaldy: AQSh (89 oqıǵa), Kanada (24), Ekvador (6), Meksıka (5), Brazılııa (2) jáne Domınıkan Respýblıkasy (1).
