Argentınada buryn ǵylymǵa belgisiz bolǵan dınozavr túri anyqtaldy
ASTANA. KAZINFORM – Paleontologter Argentınanyń Patagonııa óńiriniń ońtústiginen buryn ǵylymǵa belgisiz bolǵan dınozavr túriniń qaldyqtaryn tapty. Syrtqy kelbeti qutan qusyna uqsaıtyn bul janýar shamamen 70 mıllıon jyl buryn tirshilik etken, dep habarlaıdy «MIR24» telearnasy.
Ǵalymdar jańa túrdi Kank australis dep atady. Ony jikteý dınozavrdyń tisteri, omyrtqalary men saýsaq súıekteriniń qaldyqtary tabylǵannan keıin múmkin boldy. Qazba jumystary Santa-Krýs provıntsııasyndaǵy El-Kalafate qalasy mańynda júrgizilgen.
Zertteýshilerdiń aıtýynsha, dınozavr jyrtqysh bolǵan jáne qazirgi qutandar sııaqty balyq aýlap qorektengen. Onyń dene uzyndyǵy shamamen úsh metrge jetken.
Kank australis-tiń basty ereksheligi – moıyn omyrtqalarynyń erekshe qurylysy. Olardyń ishinde moıynnyń kúrt qozǵalysy kezinde qan tamyrlaryn zaqymdanýdan qorǵaıtyn arnaıy qurylymdar ornalasqan. Mundaı anatomııalyq elementter qazirgi uzyn moıyndy qustarda da kezdesedi.
Dınozavrdyń ataýy da kezdeısoq tańdalmaǵan. Ol Patagonııada ejelden mekendegen teýelche halqynyń mıfologııalyq túsinikterimen baılanysty.
Eske sala ketsek, Saýd Arabııasynda mýmııalanǵan qabylan súıekteri tabylǵanyn jazdyq.
Sondaı-aq AQSh-ta dınozavrlar qyrylǵan kezeńde tirshilik etken atjalman qańqasy tabyldy
