Argentına vıtse-prezıdentine qastandyq: tapansha atylmaı qalǵan
NUR-SULTAN. QazAqparat – Argentına vıtse-prezıdenti Krıstına Fernandes de Kırshnerge Býenos-Aıreste úıiniń janynda bireýler qastandyq jasamaq boldy, dep habarlaıdy QazAqparat VVS aqparat agenttigine silteme jasap.
Burynǵy prezıdenttiń qasyna jaqyndaǵan belgisiz er adam onyń basyna tapansha aparyp, atýǵa oqtalǵanda, qarýy atylmaı qaldy. Oqıǵa Kırshner el astanasyndaǵy úıiniń aldynda óz jaqtastaryn qarsy alǵan kezde bolǵan.
Áleýmettik jelide qastandyq sáti beınelengen vıdeo jarııalandy.
Onda Kırshner óz jaqtastarymen amandasyp jatqanda qasyna jaqyndaǵan er adamnyń tapansha kóterip, onyń betinen atýǵa árekettengeni kórinip tur.
Argentına prezıdenti Alberto Fernandestiń aıtýynsha, tapansha oqtaýly edi, al Kırshner tek kezdeısoq jaǵdaı arqasynda ǵana aman qaldy
«Krıstına aman. Іshinde bes patrony bolǵan tapansha beımálim tehnıkalyq sebepterge baılanysty atpaı qalǵan», - dedi ol.
Onyń aıtýynsha, bul qastandyq áreket 1983 jyly áskerı dıktatýradan demokratııaǵa ótkennen bergi el tarıhyndaǵy eń aýyr oqıǵalardyń biri boldy.
Eske salaıyq, 69 jastaǵy Kırshner 2007-2015 jyldar aralyǵynda Argentınanyń prezıdenti bolǵan.
Tamyz aıynda Argentınanyń bas prokýrory ony eki prezıdenttik merzimi kezinde sybaılas jemqorlyqqa qatysy bar degen aıyppen 12 jylǵa bas bostandyǵynan aıyrýdy jáne ómir boıy memlekettik qyzmetten shettetýdi surady.
Atap aıtqanda, Kırshner memleketke bir mlrd dollarǵa jýyq shyǵyn keltirgen para alý jáne aqsha qaıtarý júıesin uıymdastyrdy degen kúdikke ilindi. Kırshner ózine taǵylǵan aıyptardy joqqa shyǵaryp, olardy saıası kek dep sanaıdy.
Qazirgi kezde onyń soty jalǵasyp jatyr. Sońǵy kúnderi vıtse-prezıdenttiń úıine júzdegen adam kelip, ony qoldaıtynyn bildirdi.
Kırshner isi boıynsha sheshim shyǵarýǵa birneshe aı qajet.
Foto: bbc.com
