Argentına soty Venesýela basshysy Madýrony qamaýǵa alýǵa order berdi

ASTANA.KAZINFORM – Nıkolas Madýro men basqa da birqatar Venesýela basshylary adamzatqa qarsy qylmys jasady degen kúdikke ilindi. Argentına soty osyndaı qylmysqa qatysty jalpyǵa birdeı ıýrısdıktsııa negizinde orderler shyǵardy, dep jazady DW.

Argentına soty dúısenbi, 23 qyrkúıek kúni Venesýela basshylyǵynyń birqatar múshelerin, sonyń ishinde osy eldiń basshysy Nıkolas Madýrony qamaýǵa alýǵa order berdi.

«Argentınanyń ádilet organdary Nıkolas Madýrony, Dıosdado Kabelony jáne Venesýela úkimetiniń basqa basshylaryn adamzatqa qarsy qylmys jasaǵany úshin qamaýǵa alýǵa ruqsat berdi», - dep habarlady Vensýela basshylaryn qamaýǵa alýǵa qol jetkizgen argentınalyq demokratııany qorǵaý forýmy.

Sot qaýlysynda «Venesýelada kem degende 2014 jyly ázirlengen jáne búgingi kúnge deıin qoldanysta bolyp kelgen qýǵyn-súrgin, adamdardyń kúshpen joǵalyp ketýi, azaptaý, kisi óltirý jáne beıbit turǵyndardyń bir bóligine qatysty qýdalaýdyń júıeli jospary bar» ekendigi dáleldengen.

Argentına soty qamaýǵa alýǵa order berer kezde adamzatqa qarsy qylmystardy qamtıtyn jalpy ıýrısdıktsııa prıntsıpin basshylyqqa aldy.

Venesýelany 2013 jyldan beri basqaryp kele jatqan Madýro eldegi rejımdi jaqtaýshylardan turatyn saılaý komıssııasy ony jeńimpaz dep jarııalaǵannan keıin úshinshi ret prezıdenttik merzimine qol jetkizdi. Alaıda Venesýela úkimeti Madýronyń jeńisin rastaıtyn daýys berý nátıjelerin áli jarııalaǵan joq.

Buǵan deıin Venesýela soty Argentına prezıdentin qamaýǵa alýǵa order bergenin habarlaǵan bolatynbyz.