Argentına soty Krıstına Kırshnerdi memlekettik qyzmetten ómir boıyna shettetti

ASTANA. KAZINFORM — Argentına Joǵarǵy soty eldiń burynǵy prezıdenti Krıstına Fernandes de Kırshnerge qatysty alty jylǵa bas bostandyǵynan aıyrý jazasyn kúshinde qaldyrdy. Bul sheshim oǵan ómir boıy memlekettik qyzmet atqarýǵa tyıym salady, dep jazdy Euronews.

Sot ony jemqorlyq jasady dep tanydy: prezıdent jáne birinshi hanym bolǵan kezinde 50-den astam memlekettik qyzmetti zańsyz taǵaıyndaǵany úshin aıypty dep tanyldy.

Úkim jarııalanǵan soń Býenos-Aıreste eks-prezıdenttiń jaqtastary kóshege shyǵyp, narazylyq aktsııasyn ótkizdi. Olar el astanasynyń basty kóshelerin jaýyp, Kırshnerge qarsy kózqarasymen tanymal «Canal 13» jáne «Todo Noticias» telearnalarynyń keńselerine basyp kirdi.

Qorǵaýshylardyń aıtýynsha, sot quramyndaǵy sýdıalar eks-prezıdenttiń saıası qarsylastaryna jáne iri ekonomıkalyq toptarǵa jaqyn bolǵan. Kırshnerdiń ózi bul úkimdi saıası qýǵyndaý dep baǵalap, «bılik shynaıy oppozıtsııa emes, ekonomıkalyq elıtanyń qolynda» dedi.

Argentına Іshki ister mınıstrligine 72 jastaǵy Kırshner úshin kúzetpen ustalatyn oryn daıyndaý tapsyryldy. Advokattary onyń jasyn eskere otyryp, úıqamaqpen jazasyn óteýdi surap otyr.

Buǵan deıin, 2022 jyly Kırshner jemqorlyq aıybymen sottalǵan bolatyn. Ol kezde sot kásipker Lasaro Baes pen burynǵy mınıstr Hose Lopeske artyqshylyq jasaǵany úshin kináli dep tapqan. 2025 jylǵy naýryzda Joǵarǵy sot onyń úkimdi qaıta qaraý týraly ótinishin qanaǵattandyrmady.

Eks-prezıdenttiń advokattary bul isti halyqaralyq quqyq qorǵaý uıymdaryna jetkizetinin málimdedi.

Buǵan deıin Argentına parlamenti prezıdentke qatysty janjaldy tergeý úshin komıssııa quratyny habarlanǵan.