Argentına prezıdentiniń kortejine demonstranttar tas pen bótelke laqtyrdy
ASTANA. KAZINFORM – Haver Mıleı úgit-nasıhat sharasyn ótkizbek bolǵan kezde onyń qarsylastary kortejine tas pen bótelke laqtyrǵan.
La Gaceta basylymynyń málimetinshe, oqıǵa Býenos-Aıres provıntsııasyndaǵy Lomas-de-Samora qalasynda boldy. Munda 2025 jyldyń 7 qyrkúıeginde jergilikti zań shyǵarýshy organdardyń saılaýy ótedi dep josparlanǵan.
– Mıleı tóbesi ashyq kólikte jınalǵandarmen sálemdesti. Onymen birge sybaılas jemqorlyqqa qatysy bar degen kúdikke ilingen ápkesi Karına Mıleı de boldy, - delingen habarlamada.
Osy kezde onyń jaqtastary, polıtsııa jáne demonstranttar arasynda qaqtyǵys týyndady. Prezıdenttiń qaýipsizdik qyzmeti memleket basshysyn dereý qaýipsiz jerge kóshirdi.
Prezıdenttiń resmı ókili Manýel Adornı tártipsizdikterden eshkim zardap shekpegenin aıtty. Ol tártipsizdikterge burynǵy prezıdent Krıstına Fernandes de Kırshnerdiń jaqtastaryn aıyptady.
2025 jyldyń aqpanynda Argentınada oppozıtsııa prezıdentke krıptovalıýtalyq jarnamaǵa qatysty ımpıchment jarııalaýdy talap etti. Naýryzda Býenos-Aırestiń ortalyǵynda úlken narazylyq aktsııasy ótti. Onda qatysýshylar zeınetkerlerdi qoldaýǵa, turmys jaǵdaıyn jaqsartýǵa jáne polıtsııanyń áreketterine qarsy turýǵa shaqyrdy.
Eske sala keteıik, Argentına soty Krıstına Kırshnerdi memlekettik qyzmetten ómir boıyna shettetti.