Argentına prezıdenti Haver Mıleı «alaıaqtyq jasady» degen kúdikke ilindi

ASTANA. KAZINFORM – Mıleıge qarsy sotqa 100-den asa shaǵym túsken. Argentına prezıdenti krıptovalıýta daýyna ilikti, dep jazady TASS.

Shaǵymdarda «el prezıdenti alaıaqtyq jasady» delingen, sondaı-aq ol laýazymyna sáıkes kelmeıtin qyzmetpen aınalysty, sóz baılasý jáne basqa da qylmystar jasady dep aıyptalǵan.

Argentına prezıdenti Haver Mıleıge qarsy áleýmettik jelide alaıaqtyq krıptovalıýtalyq shemany nasıhattaǵany úshin 100-den astam sot isi qozǵaldy. Іsterdi qaraýǵa prokýror Edýardo Taıano men sýdıa Marııa Servını taǵaıyndalǵan.

14 aqpanda Mıleı X saıtynda krıptovalıýta arqyly Argentınadaǵy shaǵyn bızneske ınvestıtsııa tartýǵa kómektesetin joba týraly aqparat jarııalaǵan. Áleýmettik jelide synnyń astynda qalǵannan keıin prezıdent jobanyń egjeı-tegjeıinen beıhabar ekenin aıtyp, jazbany óshirip tastaǵan. 

Degenmen, prezıdent keńsesiniń 15 aqpanda jarııalaǵan málimdemesinde Mıleı jobaǵa qatysy bar adamdarmen kem degende eki ret kezdesip, atalǵan jobany talqylaǵany aıtylǵan.

Prezıdenttiń alǵashqy jarııalaǵan jazbasymen bir ýaqytta iske qosylǵan jobada paıdalanylǵan krıptovalıýtanyń quny 5 dollarǵa deıin kóterilgen bolatyn, keıin ol quldyrap, quny 1 dollarǵa da jetpeı qaldy.

Krıptovalıýta ıeleri qysqa ýaqyt ishinde mıllıondaǵan dollar tabysqa kenelgen. Prezıdent málimdemesinen keıin oppozıtsııa ony túrli qylmystar, onyń ishinde nemquraılylyq, aqshany jylystatý, memlekettik qyzmetshi laýazymyna sáıkes kelmeıtin áreketterge bardy dep aıyptaı bastady. «Otan úshin odaq» partııasynyń bir top depýtaty Mıleıge ımpıchment jarııalaýdy usynatyndaryn aıtty.

Aıta keteıik, «Argentına men AQSh arasynda ortaq ne bar» degen suraqqa Kazinform tilshisi jaýap izdep kórgen bolatyn.

Sondaı-aq, ótken jyldyń qyrkúıek aıynda Venesýela soty Argentına prezıdentin qamaýǵa alýǵa order berdi.