Argentına men Qazaqstan arasyndaǵy Devıs Kýbogy úshin matchtar josparlanǵan merziminen buryn ótedi
ASTANA. 11 sáýir. QazAqparat - Argentına men Qazaqstan arasyndaǵy Devıs Kýbogy úshin matchtar josparlanǵan merziminen buryn ótetin boldy. Bul týraly Tennıs federatsııasynan habarlady.
«Halyqaralyq tennıs federatsııasy (ITF) Argentına men Qazaqstan quramalary arasyndaǵy Devıs Kýbogy úshin 1/4 fınaldyq matchtyń merzimi ózgergendigin rastady. Devıs kýbogynyń kúntizbesi boıynsha, barlyq shırekfınaldyq kezdesýler 8-10 shilde aralyǵynda ótýi tıis bolatyn. Biraq 10 shilde, jeksenbide Býenos-Aırestiń meri men úkimetiniń saılaýy ótetindikten, Argentına-Qazaqstan matchy 2011 jyldyń 7-9 shildesine aýystyryldy», - delingen habarlamada.
Osylaısha, Devıs kýbogy úshin Argentına-Qazaqstannyń ¼ fınaldyq matchy Býenos-Aıreste: 7 shildede - jekeleı eki oıyn; 8 shildede - juppen bir oıyn; 9 shildede - jekeleı eki oıyn ótedi. Matchtar Parque Roca stadıonynda ótedi.
