Argentına ınvestıtsııa salǵandarǵa azamattyq beretin baǵdarlamany iske qosady
ASTANA. KAZINFORM — Argentına ınvestıtsııa salǵan sheteldikterge azamattyq beretin baǵdarlamany iske qosady. Osylaısha, Ońtústik Amerıkada mundaı tetik usynǵan alǵashqy el bolmaq. Ótinimderdi 2026 jyldyń IV toqsanynda qabyldaý josparlanyp otyr, dep habarlaıdy eldiń Ekonomıka mınıstrligi.
Baǵdarlamany iske qosý týraly Argentına ekonomıka mınıstri Lýıs Kapýto Parıjde ótken «Argentına aptalyǵy» sharasynda prezıdent ákimshiliginiń basshysy Dıego Santıllımen birge málimdedi. Úkimet bul baǵdarlama arqyly sheteldik kapıtal tartýdy jáne eldiń halyqaralyq ekonomıkalyq baılanystaryn keńeıtýdi kózdeıdi.
Argentına ekonomıka mınıstrliginiń málimetinshe, azamattyq alýdyń eki joly qarastyrylǵan. Birinshi nusqa boıynsha Ulttyq qazynaǵa qaıtarymsyz túrde 350 myń dollar aýdarý qajet. Ekinshi nusqada 800 myń dollarǵa arnaıy shyǵarylǵan memlekettik oblıgatsııalardy satyp alý talap etiledi.
Baǵdarlama negizgi ótinish berýshiniń otbasy múshelerin de qamtıdy. Jubaıy men 18-25 jas aralyǵyndaǵy balalary nekede turmasa jáne balalary bolmasa, baǵdarlamaǵa qatysa alady. Olardyń árqaısysy úshin 100 myń dollardan tólem qarastyrylǵan. Kámeletke tolmaǵan balalar úshin bul soma 25 myń dollar kóleminde bolmaq.
Osylaısha, tórt adamnan — ótinish berýshi, jubaıy jáne eki kámeletke tolmaǵan baladan — turatyn otbasy jalpy 500 myń dollar tólep, azamattyq alýǵa ótinish bere alady.
Barlyq qarjylyq operatsııa resmı bank júıesi arqyly júrgizilýi tıis. Úkimet qarajattyń shyǵý tegin tekserip, aqshany jylystatýǵa jáne terrorızmdi qarjylandyrýǵa qarsy halyqaralyq talaptardy saqtaýdy, sondaı-aq qarjylyq ashyqtyqty qamtamasyz etýdi josparlap otyr.
Kandıdattar birneshe baǵyt boıynsha tekserýden ótedi. Olardyń qatarynda jeke basyn anyqtaý, qarajattyń shyǵý tegi men zańdylyǵy, qarjylyq jaǵdaıy, ıýrısdıktsııalyq táýekelder, sottylyǵy, bedeli jáne kóshi-qon tarıhy bar.
Ótinimderdi ınvestıtsııa arqyly azamattyq alý baǵdarlamalary jónindegi arnaıy agenttik qaraıdy. Bul jumysqa barlaý qyzmeti, Qarjylyq aqparat bólimshesi, sondaı-aq Qaýipsizdik jáne Іshki ister mınıstrlikteri sııaqty memlekettik organdar tartylady.
Tekserý aıaqtalǵannan keıin agenttik qorytyndysyn Ulttyq kóshi-qon basqarmasyna joldaıdy. Ótinimdi maquldaý nemese qabyldamaý týraly sońǵy sheshimdi osy organ qabyldaıdy.
Baǵdarlamany ázirleý kezinde Argentına bıligi qarjylyq baqylaý men táýekelderdi basqarýdyń halyqaralyq standarttaryn, sonyń ishinde Ekonomıkalyq yntymaqtastyq jáne damý uıymy (EYDU) men Qarjylyq áreket jónindegi jumys tobynyń (FATF) usynymdaryn qoldanýdy josparlaǵan. Sonymen qatar úkimet ınvestıtsııalyq kóshi-qon salasyndaǵy halyqaralyq sarapshylarmen keńesip jatyr.
Eske sala keteıik, Argentınada kedeılik sheginde ómir súretinder sany artty.
