Argentına álem chempıonatynda qatarynan eki márte fınalǵa shyqty
ASTANA. KAZINFORM - Fýtboldan 2026 jylǵy álem chempıonatynyń 1/2 fınalyndaǵy Argentına - Anglııa kezdesýiniń nátıjesi belgili boldy.
Bul oıynnyń qos qurama úshin mańyzy erekshe edi. Argentınalyq fýtbolshylar qazirge deıin 1978, 1986, 2022 jyldary álem chempıony atandy. Sondyqtan sol jeńisti joldy bıyl da jalǵastyrǵysy keledi. Olar 1930, 1990, 2014 jyldary kúmis júldege qol sozdy.
Al Anglııa quramasy 1966 jyly álem chempıony ataǵyn jeńip alǵan edi. Odan keıin tek 2014 jyly tórtinshi orynǵa taban tiredi. Endeshe, anglııalyq fýtbolshylar alpys jyldan keıin altynǵa qol sozýǵa taǵy bir taban jaqyn turdy.
Kezdesý barysynda komandalar alǵashqy mınýttan birden shabýylǵa kóshti. Qos qurama gol soǵatyn múmkindikti izdedi. Dese de birinshi kezeńde olar úshin esep ashatyn eshqandaı qolaıly sát týyndaǵan joq.
Ekinshi kezeńde de oıyn barysy dál osyndaı jaǵdaıda órbidi. Oıynnyń 55-mınýtynda anglııalyq Entonı Gordon esep ashsa, oǵan Ońtústik Amerıka qurlyǵynan kelgen quramadan Entso Fernandes 85, Laýtaro Martınes 92-mınýtta eki golmen jaýap berdi.
Osylaısha Argentına qarsylasynan 2:1 esebimen basym túsip, fınalǵa joldama aldy.
Argentınalyq fýtbolshylar J tobynda synǵa túsip, birde-bir upaıdan shashaý shyǵarǵan joq. Olar Aýstrııany 2:0, Aljırdi 3:0, Iordanııany 3:1 esebimen tize búktirip, óz tobynda toǵyz upaımen birinshi oryn aldy. Odan keıin argentınalyq fýtbolshylar Kabo-Verdeni qosymsha kezeńde 3:2, Mysyrdy 3:2, 1/4 fınalda Shveıtsarııany qosymsha kezeńde 3:1 esebimen jeńdi.
Eske salsaq, budan buryn Ispanııa quramasy fýtboldan 2026 jylǵy álem chempıonatynyń jartylaı fınalynda Frantsııany 2:0 esebimen jeńdi.
Endi fınal men 3-oryn úshin saıys 19 shildege belgilengen.
