Arestke túsken baspananyń satylyp jatqanyn xalyqqa da kórsetý kerek - mınıstr Beketaev
«Negizi, osy saladaǵy jaǵdaıdy qazaqstandyqtar ǵana emes, sheteldikter de jiti baqylap otyr. Mysaly, men aǵymdaǵy aptada Halyqaralyq sot oryndaýshylary qaýymdastyǵynyń ókilderimen kezdesken edim. Olardy ózim shaqyrdym. Buǵan deıin atalǵan uıymnyń basshysy da kelip ketti. Biz barlyq máselelerdi talqylap shyqtyq. Sebebi Qazaqstanda jeke menshik sot oryndaýshylaryna qatysty problema óte kóp. Biz sotqa 11 aryzdy jaıdan jaı túsirmeımiz», - dedi M.Beketaev xalyqqa esep berý kezdesýi kezinde.
Mınıstrdiń aıtýynsha, tárkilengen múlikti elektrondy formatta satýǵa qatysty úlken bir másele bar. Atalǵan saýda-sattyqty ashyq júrgizýge bolady. Alaıda eshqandaı ózgerister joq. «Byltyr biz talaı ret usynys jasadyq. Máselen, atalǵan elektrondy saýda-sattyqty xalyq arasynda keńinen tanytý úshin ony basqa saıttarmen baılanystyrýǵa bolady. Bireý páter alǵysy kelse, ony ınternetten izdemeı me? Sóıtip, barlyq xabarlandyrýlardy qaraıdy. Al arestke túsken baspana týraly aqparat basqa saıttarda jarııalansa, ondaı saýda-sattyq jaıynda budan da kóp adam biletin edi. Biraq osy jumys áli atqarylǵan joq», - dep atap kórsetti M.Beketaev.
Aıta keteıik, kezdesý kezinde mınıstr sot oryndaýshylarynyń qyzmetine qatysty zań jobasynyń Parlamenttiń qaraýynda jatqanyn jetkizdi. «Atap aıtqanda, sot oryndaýshylarynyń qyzmetine sanktsııa salýdy qysqartý týraly usynys bar. Bylaısha aıtqanda, atalǵan ınstıtýtty damytý sharalary jalǵasa beredi. Sot oryndaýshylaryn jaýapkershilikke tartý tetikteri de qalady. Biraq ókilettilikterdiń biraz bóligi sottan sot oryndaýshylaryna beriledi», - deıdi M.Beketaev. Mınıstrdiń aıtýynsha, shetelge shyǵýǵa qoıylǵan shekteýdi alyp tastaýdyń naqty merzimi bekitildi.
