Arendalyq úılerdi satyp alý tetigin qaıtarǵan durys - mınıstr

ASTANA. QazAqparat – Indýstrııa jáne ınfraqurylymdyq damý mınıstri Marat Qarabaev arendalyq baspanany satyp alý tetigin qaıtarý kerek degen pikir bildirdi, dep habarlaıdy QazAqparat tilshisi.

«Burynǵy áriptesińiz Qaıyrbek Óskenbaev myrza buǵan deıin jalǵa beriletin úıler jekeshelendiriledi dep aıtqan edi. Sol jumys qalaı júrgizilip jatyr? Úkimetke usynys áziledińizder me?» - dep surady BAQ ókili Marat Qarabaevtan.

Mınıstrdiń aıtýynsha, bul másele dál qazir kún tártibinde joq.

«Jalǵa beriletin úılerdi jekeshelendirý máselesin qarastyryp jatqan joqpyz. Qazir Parlamentte jatqan zań jobasynda ol másele qarastyrylmaǵan. Qoǵam belsendileri bul máseleni kóterdi. Ony qosymsha qarastyramyz», - dedi vedomstvo basshysy.

Sondaı-aq, ol atalǵan máseleni múgedektigi bar jáne balalar úıinde tárbıelengen azamattar kóterip júrgenin atap ótti.

«Osy ýaqytqa deıin salynyp, jalǵa berilgen 36 myń úı bar. Bıyl taǵy ákimdik tarapynan 10 myń úıdi satyp alýǵa qarjy bóldik. 2023 jyldyń qorytyndysy boıynsha elimizde jalǵa beriletin 46 myń úı bolady. Jalpy kelisemin, ol úıler ıesiz bolǵandyqtan jaǵdaıy tómen. Menshik ıesi bolmaǵandyqtan, durys qaralmaıdy. Sondyqtan, keıbir toptarǵa óziniń qunymen, ıaǵnı qandaı qunmen salynǵan nemese alynǵan bolsa, sol qunymen jekeshelendirýge múmkindik bergen jón», - dedi ol.