Áreń aıaqtadym: Tıhon Varehın Azııa oıyndarynyń fınalyna qalaı ótti
ASTANA. KAZINFORM — Qazirgi bessaıystan Qazaqstan quramasynyń ókili Tıhon Varehın 2026 jylǵy Azııa oıyndarynyń fınalyna joldama aldy. Jartylaı fınaldan keıin qazaqstandyq sportshy kedergiler jolaǵynda nelikten táýekelge barmaǵanyn jáne jarystyń qaı kezeńi eń qıyn bolǵanyn aıtyp berdi. Bul týraly UOK jazdy.
— Jartylaı fınalǵa qoıǵan josparymnyń bárin oryndadym. Kedergiler jolaǵynda oılaǵanymdaı óner kórsettim. Tek saqınalarda táýekelge barmaı, saqtyq tanyttym. Upaıym men ornymdy saqtap qalǵym keldi. Birqalypty óttim. Óte jaqsy boldy dep aıta almaımyn, biraq qatelespeı, táýekelge barmadym. Qalǵan saıystarda da bári jaqsy boldy. Júzýden jeke rekordymdy jańarta almadym, degenmen jalpy nátıje jaman emes, — dedi ol.
Sportshy bul joly lazer-ran óte qıyn bolǵanyn aıtady.
— Kún qatty ystyq, aýa da qapyryq. Jarysty bar kúshimdi salyp, áreń aıaqtadym deýge bolady. Degenmen bári sátti ótti. Fınalǵa shyqqanyma qýanyshtymyn. Endi alǵa qaraı jumys isteımiz. Sheshýshi saıysqa barynsha jaqsy daıyndalamyn. Bar kúshimdi salamyn. Kóp nárse kedergiler jolaǵyna baılanysty bolady. Ondaǵy kedergiler ár jarysta ózgerip otyrady. Sondyqtan trassanyń ereksheligine qaraı taktıka quramyz, — dedi Varehın.
Aıta keteıik, Tıhon Varehın jartylaı fınalda A tobynda tórtinshi oryn alyp, 2026 jylǵy Azııa oıyndarynyń fınalyna joldama aldy.
Qazirgi bessaıystan erler arasyndaǵy fınaldyq saıys 20 qyrkúıekte ótedi.
