Árdaıym «demalys maýsymyna tolyq daıynbyz» degen ádemi esep beriledi — Bektenov

ASTANA. KAZINFORM — Úkimet basshysy Oljas Bektenov otandyq týrızm salasynyń damýynda kemshilikter baryn moıyndady.

— Týrızm salasynda problema bar ekenin joqqa shyǵarmaımyn. Kóptegen kýrorttyq oryn men demalys aımaǵy álemdik standarttarǵa ǵana emes, qaýipsizdik pen jaılylyq boıynsha negizgi talaptarǵa da saı kelmeıdi, kelisemin. Bul baǵytta jumys júrgizemiz. Ókinishke qaraı, árdaıym demalys maýsymyna tolyq daıynbyz degen ádemi esep beriledi. Alaıda is júzinde olaı bolmaı jatady. Úkimet tarapynan bul rette olqylyq bar ekenin moıyndaımyz, — dedi Premer-mınıstr.

Sondaı-aq Oljas Bektenov elimizdiń qaı óńirlerinde demalysyn ótkizgenin tilge tıek etti. 

— 2021 jyly Alakólde boldym. Sol demalystan keıin, eshqaıda barǵan joqpyn. Eń jaqyn Býrabaıǵa da shyǵa almaı júrmin. Kenderli men Alakólge issaparmen bardym, shomylǵan joqpyn, jaǵdaımen tanystym. Ózderińiz bilesizder, Kenderlide áýejaı salyp jatyrmyz. Kelesi jyldyń basynda iske qosylady dep úmittenemiz, bul óz áserin beredi, — dep tolyqtyrdy Úkimet basshysy.

Aıta ketsek, birer kún buryn vıtse-premer Ermek Kósherbaev Alakól kóliniń jaǵalaýyndaǵy demalys aımaqtaryn tekserdi. 

Artynsha Alakól jaǵalaýyndaǵy kemshilikter anyqtalyp, naqty tapsyrmalar berildi.