Ardaq Nazarov qazaqtyń úsh «batyryna» estafeta joldady
ASTANA. QazAqparat - MMA chempıony Ardaq Nazarov óziniń shákirtterimen birge Challenge Street Workout KZ aktsııasy arqyly kúsh qabiletin kórsetip, boksshy Danııar Eleýsinovke jáne elimizge belgili balýandar Aqjúrek Tańatarov pen Nurbaqyt Teńizbaevqa aktsııa tizginin ustatty, dep habarlaıdy QazAparat tilshisi QR Mádenıet jáne sport mınıstrliginiń baspasóz qyzmetine silteme jasap.
MMA chempıony men onyń sporttyq klýby Challenge Street Workout KZ saıysyna osylaı ún qosyp otyr. Ózderiniń ustazdarymen birge kishkentaı balalar da sheberlikterin pash etti. Aıta keterligi, álemniń úsh dúrkin chempıony Ardaq Nazarov chellendjdi elimizdiń maqtanyshy Qanat Islamnan qabyldaǵan bolatyn.
Aktsııaǵa qatysýshylar ártúrli sporttyq qurylymdarda, týrnıkte ózderiniń dene mashyǵyn kórsetti. Jattyǵýdy oryndaǵannan keıin Ardaq Nazarov Jazǵy Olımpıada oıyndarynyń jeńimpazdaryna qarata sóz sóıledi.
«Men bul estafetany Qanat Islam baýyrymnan qabyl aldym. Ary qaraı estafetany qazaqtyń batyrlary Danııar Eleýsinov, Aqjúrek Tańatarov pen Nurbaqyt Teńizbaev baýyryma joldaımyn. Alǵa Qazaqstan», - dedi Ardaq Nazarov óziniń shákirtteriniń ortasynda.
Eske sala ketsek, «Street Workout KZ» aktsııasyn QR Mádenıet jáne sport mınıstri Arystanbek Muhamedıuly bastap bergen bolatyn. Arystanbek Muhamedıuly jobany ózi bastap, «Street Workout KZ» baıqaýyn - Olımpıada chempıony Serik Sápıevke, tanymal ánshi Qaırat Nurtasqa, tanymal qazaqstandyq akter Ádil Ahmetovqa joldaǵan edi.
Al budan keıin boksshy Baqtııar Artaev pen taekvondoshy Arman Chılmanov QR Mádenıet jáne sport mınıstri Arystanbek Muhamedıulynyń Street workout KZ boıynsha bastamasyna qosyldy.
Aktsııany keıin Atyraý oblystyq dene shynyqtyrý jáne sport basqarmasynyń basshysy Azamat Beket Beıjiń Olımpıada oıyndarynyń taekvandodan qola júldegeri Arman Chılmanovtan estafetany qabyldap, Sochı Olımpıada oıyndarynyń qola júldegeri mánerlep syrǵanaýshy Denıs Ten jáne bokstan álem chempıony Galıb Djafarovpen birge beıne-úndeý túsirgen. Rolıkte sportshylar barlyq qazaqstandyqtardy street workout-pen aınalysýǵa shaqyrdy.
Aıta keterligi, buǵan deıin atalǵan aktsııaǵa Qanat Islam da atsalysyp, estafetany dál osy Ardaq Nazarovqa joldaǵan edi. Sportshylarmen birge estrada juldyzdary da, sheteldegi qazaq stýdentteri de belsendi túrde qatysýda.
