Ardaq Nazarov bıyl úlken sportqa qaıta oralady
ALMATY. QazAqparat - Bıylǵy jyldyń 4 qazanynda Astana qalasyndaǵy «Saryarqa» sport kesheninde aralas jekpe-jekten MMA "KUNLUNFIGHT 4 CAGE SERIES" dep atalatyn Álem birinshiligin ótkizýge qatysty búgin Almatyda ótken baspasóz máslıhaty barysynda «Alem Fighters" kásipqoı sport klýbynyń prezıdenti Ardaq Nazarov bıyl óziniń úlken sportqa qaıta oralatyndyǵyn jarııa etti.
«Men bıyl úlken sportqa qaıta oralamyn. Jalpy, men odan ketkenim joq. Tek úsh jyl úzilis boldy. Men osy aralyqta 2013 jyly «Álem faıters» dep atalatyn kásipqoı sport mektebin ashtym. Búginde onyń 4 fılıaly bar. Sondaı-aq, Qytaıdyń Qulja qalasynda da fılıal ashtyq. Maqsatymyz - álemdik sport dodalarynda el namysyn qorǵaıtyn myqty shákirtter tárbıelep shyǵarý. Búginde 1000-nan asa turaqty sportshylarymyz bar. Fılıaldarymyzda 20-dan astam sport túri boıynsha úıirmeler jumys isteıdi. Úsh jyl osy mekteptiń basy-qasynda júrdim, birqatar jarystar uıymdastyrdyq. Bul árıne kóp ýaqytty alady. Al qazir ózim shákirtterimmen birge kúnine 2-3 ret jattyǵyp júrmin. Alla qalasa, bıylǵy jyldyń qarasha nemese jeltoqsan aıynda jekpe-jekke shyǵamyn. Onyń qaı jerde, qaı tujyrym boıynsha ótetindigin jáne qarsylasymnyń kim ekendigin aldaǵy kúnderi biletin bolasyzdar», - dedi Ardaq Nazarov.
Aıta ketelik, Ardaq Nazarov - pankratıonnan úsh dúrkin Álem chempıony, Azııanyń absolıýttik chempıony, djıý-djıtsýdan Qazaqstannyń eki dúrkin chempıony, qoıan-qoltyq urystan sport sheberi.
