Ardaq Ábijanov Qazaqstan tennıs federatsııasynyń atqarýshy dırektory boldy
ASTANA. KAZINFORM — Tennısti damytý qorynyń (Gorky Tennis Park) bas dırektory Ardaq Ábijanov Qazaqstan tennıs federatsııasynyń atqarýshy dırektory qyzmetine taǵaıyndaldy.
Qazaqstan tennıs federatsııasynan málim etkenindeı, A.Ábijanov jańa qyzmetinde federatsııanyń kommertsııalyq qyzmeti men damý baǵyttaryna jetekshilik etedi, demeýshiler jáne seriktestermen ózara is-qımyl máselelerine jaýap beredi. Sondaı-aq federatsııa qyzmetin kommertsııalandyrý jáne onyń jalpy tıimdiligin arttyrý jumystaryn úılestiredi.
Ardaq Ábijanov Narhoz ýnıversıtetin úzdik támamdaǵan, University of International Business oqý ornynda MBA dárejesin alǵan. Sonymen qatar London Business School jáne Warwick Business School sekildi jetekshi halyqaralyq bıznes-mektepterinde bilimin jetildirgen.
Eńbek jolyn qarjylyq konsaltıng, aýdıt jáne mámilelerdi súıemeldeý salasynda álemdik «Úlken tórttikke» kiretin Deloitte jáne PwC kompanııalarynda bastaǵan. Keıin Qazaqstannyń iri kompanııalarynda, onyń ishinde Verny Capital kompanııalar tobynda basshylyq qyzmetter atqardy.
2017 jyldan beri Ardaq Ábijanov kásipkerlikpen aınalysyp keledi. Sonyń ishinde Qazaqstandaǵy jeke zattardy saqtaý qyzmetin usynatyn alǵashqy servıstiń negizin qalady.
2025 jyldyń qańtar aıynan bastap Tennısti damytý qoryn (Gorky Tennis Park) basqarady. Bul qyzmette ol tennıs ınfraqurylymyn, balalar-jasóspirimder jáne áýesqoı sportty damytýǵa baǵyttalǵan jobalarǵa strategııalyq turǵyda jetekshilik etedi. Oǵan qosa Alatau Tennis Ortalygy tennıs ortalyǵynyń qyzmetin úılestirip, onyń sportshylardy daıarlaý júıesi men Almaty qalasyndaǵy tennısti damytý isine tıimdi yqpaldasýyn qamtamasyz etedi.
A.Ábijanov tennısti belsendi nasıhattaýshylardyń biri ári Qazaqstannyń áýesqoı tennıs qaýymdastyǵyndaǵy jetekshi oıynshylardyń qatarynda. Ol QSLT reıtınginiń úzdik bestigine kiredi.
Ardaq Ábijanovtyń Qazaqstan tennıs federatsııasynyń atqarýshy dırektory bolyp taǵaıyndalýy – onyń kásibı tájirıbesi, basqarýshylyq quzyreti jáne elimizde tennısti damytýǵa qosqan eleýli úlesiniń joǵary baǵalanýynyń kórinisi.
A.Ábijanov Tennısti damytý qorynyń (Gorky Tennis Park) bas dırektory qyzmetin de jalǵastyra beredi.
Eske sala keteıik, budan buryn Elena Rybakınanyń álemdik reıtıngide kósh bastaý múmkindigi týraly aıtyp bergenin jazǵan edik.
