Ardagerlerge kómek kórsetý sharalary jalǵasa beredi - Ó. Ozǵanbaev

ASTANA. QazAqparat - Ardagerlerge kómek kólemi keńeıe túsedi. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngke Respýblıkalyq «Ardagerler uıymy» qoǵamdyq birlestigi Ortalyq keńesiniń tóraǵasy Ómirzaq Ozǵanbaev málim etti.

«Ardagerlerdiń ómirin zertteý jumystaryn júrgizdik. Qart maıdangerlerdiń 25 paıyzy eshqandaı qajettilikke muqtaj emestigin aıtty. Al suraý salynǵan ardagerlerdiń 66 paıyzy turmystyq jaǵdaılarǵa, ásirese áleýmettik turǵydaǵy máselelerge, ıaǵnı densaýlyq, dárigerlik kútim men dári-dármekke nazar aýdartty. Munyń ózi zańdy, óıtkeni bul qarttar soǵys jyldarynda densaýlyǵynan jáne dene múshelerinen aıyrylǵanyn bilesizder»,-dedi Ó. Ozǵanbaev.

Osy oraıda ol «Ardagerler uıymy» maıdangerlerge dári-dármekti bóletin memlekettik dárihanalardyń bolýy týraly usynysty engizip otyrǵandyǵyn jetkizdi.

Onyń sózine qaraǵanda, Uly Otan soǵysyna qatysqan búginde 5 myńǵa jetpeıtin ardager qaldy. Olardyń sany kún saıyn azaıyp kele jatyr. Jartysyna jýyǵy densaýlyǵyna baılanysty tósekke tańylǵan.

«Ardagerlerge kómek kórsetý sharalary ary qaraı da jalǵasa beredi. Osy oraıda barlyq qoldaý sharalary 9 mamyrmen aıaqtalmaıdy. Bıyl jáne aldaǵy jyldary da qatary sırep qalǵan ardagerlerge kómek kólemi keńeıe túsedi dep oılaımyz»,-dedi Ó. Ozǵanbaev.