Ardagerlerge arnalǵan medıtsınalyq kómekti jetildirý joldary qaraldy
ASTANA. KAZINFORM — Májilis depýtattary Astanadaǵy ardagerlerge arnalǵan ortalyq klınıkalyq gospıtal ujymymen kezdesti.
Ardagerlerdiń densaýlyǵyn saqtaý, qart patsıentterge kómek kórsetý júıesin damytý jáne medıtsına qyzmetkerlerin qorǵaý máseleleri jıynnyń basty taqyryby boldy.
Kezdesý barysynda depýtattar búgingi tańda aǵa býyn adamdarǵa medıtsınalyq kómek kórsetý júıesi qalaı qurylǵanyn, eldegi gerontologııa men gerıatrııanyń qalaı damyp jatqanyn jáne Parlamenttiń odan ári jumysynyń nazarynda qandaı mindetter qalýy kerektigin egjeı-tegjeıli talqylady.
Májilis depýtattary ardagerler, tyl eńbekkerlerine jáne olarǵa teńestirilgen azamattar sanattaryna mamandandyrylǵan kómek kórsetetin gospıtal — biregeı medıtsınalyq mekemeniń qyzmetimen tanysty.
Depýtattar egde jastaǵy adamdardyń densaýlyǵyn saqtaý ómir sapasyn, belsendi uzaq ómir súrýdi jáne qoǵamnyń áleýmettik turaqtylyǵyn qamtamasyz etýdiń negizgi faktorlarynyń biri ekenin atap ótti. Gerıatrııanyń medıtsınalyq kómektiń derbes baǵyty retindegi róline, keshendi gerıatrııalyq baǵalaýdy, pánaralyq tásildi jáne kómek kórsetý deńgeıleri arasyndaǵy sabaqtastyqty engizý qajettiligine erekshe nazar aýdaryldy.
— Halyqtyń qartaıýy jaǵdaıynda gerontologııa men gerıatrııany damytý máseleleri strategııalyq mańyzǵa ıe. Búgingi tańda problemalar týraly aıtyp qana qoımaı, egde jastaǵy azamattarǵa qoljetimdi, sapaly jáne keshendi medıtsınalyq kómek kórsetetin júıeli zańnamalyq sheshimderdi qalyptastyrý mańyzdy. Halyqtyń qartaıýy bolashaq máselesi emes, búgingi kúnniń shyndyǵy. Qazaqstannyń qart azamattarynyń ómir súrý sapasy qazir qandaı sheshim qabyldaıtynymyzǵa tikeleı baılanysty, — dep atap ótti Pavel Kazantsev.
Ótken senbide Memleket basshysy Qasym-Jomart Toqaev medıtsına qyzmetkerleri men jedel járdem qyzmet qyzmetkerlerine qater tóndirgeni jáne zorlyq-zombylyq kórsetkeni úshin jaýapkershilikti kúsheıtetin tıisti zańǵa qol qoıdy. Zań dárigerlerdiń qaýipsizdigin qamtamasyz etýdegi negizgi qadam boldy. Sonymen qatar, 2024 jyldan bastap elimizde medıtsına qyzmetkerleriniń kásibı jaýapkershiligin mindetti saqtandyrý júıesi engizildi. Endi medıtsınalyq qatelik boıynsha tólemder mamandardyń jeke qarajatynan emes, saqtandyrý tetikteri esebinen júzege asyrylady.
Jıynda depýtattar medıtsına qyzmetkerleriniń barlyq suraǵyna jaýap berip, ózekti máseleler týraly ashyq sóılesti. Jergilikti mamandardyń usynystary men máselelerin depýtattar baqylaýǵa alady, olar salalyq mınıstrliktermen birlesip pysyqtalatyn bolady.
Májilis depýtattarynyń óńirlerdegi kezdesýleri 5-13 qańtar aralyǵynda jalǵasady. Jumys saparlary barysynda depýtattar saılaýshylardy qabyldanǵan zańdar týraly habardar etedi, olardyń jergilikti jerlerde qoldanylý barysyn zerdeleıdi jáne azamattardy tolǵandyratyn ózekti máseleler men problemalardy tyńdaıdy.