«Ardagerler uıymy» kezekten tys Prezıdenttik saılaýǵa qatysty málimdeme jasady

"14 aqpanda Qazaqstan halqy Assambleıasy 2015 jyly kezekten tys Prezıdenttik saılaý ótkizý jóninde usynys jasady.

"Ardagerler uıymy" Respýblıkalyq qoǵamdyq birlestiginiń Ortalyq keńesi bul usynysty tolyqtaı qoldaıtynyn málimdeıdi", - dep jarııalady uıym tóraǵasy Ómirzaq Ozǵanbaev. Onyń aıtýynsha, qazirgi tańda qarjylyq-ekonomıkalyq daǵdarystyń jańa tolqyny beleń alýda. Buǵan kúrdeli halyqaralyq jaǵdaı da qosylyp tur. Qazaqstan álemdik qaýymdastyqtyń bir bólshegi retinde dúnıejúzilik daǵdarystyń áserin sezinip otyr. "Áıtse de, daǵdarysqa qarsy tótep bererlik naqty josparymyz da barshylyq. Ol - Elbasymyzdyń bastamasymen ómirge kelgen "Nurly jol" baǵdarlamasy. Uzaq merzimdik "Qazaqstan-2050" strategııasy men Údemeli ındýstrııalyq-ınnovatsııalyq damý baǵdarlamasy da bar. Biz osyndaı sátte ýaqyt ozdyrmaı kezekti saılaý ótkizý kerek dep esepteımiz", - delingen málimdemede. "Bul qadamymyz barsha halyq bolyp, Úkimet pen Parlament, barlyq ortalyq jáne jergilikti basqarý organdary birlese jumys isteýiniń arqasynda álemdik daǵdarysty eńserýge múmkindik beredi degen oıdamyz", - dep atap ótti Ó. Ozǵanbaev. Málimdemede, sondaı-aq, "Ardagerler uıymy" Respýblıkalyq qoǵamdyq birlestiginiń Ortalyq keńesi elimizdiń barlyq azamattaryn, qoǵamdyq uıymdardy osy usynysty qoldaýǵa shaqyrady. "Bul joly da bárimiz jumylyp judyryq bolyp, qýatty ári gúldengen Otanymyz - Qazaqstan Respýblıkasyn qurý jolyndaǵy kezdesken qıyndyqtardy jeńip shyǵatynymyzǵa senimdimiz", - delingen málimdemede.