Ardagerler týraly zań barlyq quqyqtyq kemshilikterdiń ornyn toltyrady - depýtat
NUR-SULTAN. QazAqparat – «Ardagerler týraly» Zańnyń qabyldanýy osy saladaǵy barlyq quqyqtyq ári áleýmettik kemshilikterdiń ornyn toltyrýǵa múmindik berdi. Bul týraly Parlament Májilisiniń depýtaty Pavel Kazantsev málim etti, dep habarlaıdy QazAqparat tilshisi.
«Memleket basshysy qol qoıǵan «Ardagerler týraly» Zańdy Parlament Májilisi men Senaty qysqa merzimde talqylap shyqty. Atap aıtqanda, bul zańdy el halqy kópten kútti. Osy oraıda ardagerlerge qatysty barlyq quqyqtyq ári áleýmettik kemshilikterdiń ornyn toltyrýǵa múmkindik berilip otyr», - dedi depýtat.
Onyń aıtýynsha, qoǵamda ardager - ol tek Ekinshi dúnıejúzilik soǵys ardageri degen túsinik qalyptasqan. Shyn máninde, ardagerler sanaty aıtarlyqtaı keń sıpatqa ıe. Bul turǵyda Aýǵan soǵysy ardagerleri, chernobyldikter jáne basqalaryn qamtýǵa bolady.
«Bul adamdar áskerı qyzmeti nemese tótenshe jaǵdaı kezinde memleket múddesi úshin qandaı da bir qıyndyqtarǵa tap bolyp, sony laıyqty túrde eńserdi», - dedi P. Kazantsev.
Osy oraıda ol zańda ardagerlerge tıesili jeńildikter jáne osy jeńildikterdiń rásimderi naqtylanǵanyn atap ótti.
«Bul qujattyń qabyldanýyn ardagerler qoǵamdastyǵy kútti. Áleýmettik saıasatty kúsheıtý boıynsha Memleket basshysy bastamashylyq etken usynystar aıasynda biz qajetti qadamdar jasap, osyndaı zań jobasyn ázirledik. Sondyqtan osy meıram qarsańynda qabyldanǵan atalǵan zańdy mańyzdy dep bilemin», - dedi Pavel Kazantsev.
Aıta keteıik, Memleket basshysy «Ardagerler týraly» Qazaqstan Respýblıkasynyń Zańyna qol qoıǵan bolatyn.
Budan buryn habarlanǵandaı, 30 sáýir kúni Parlament Senatynyń jalpy otyrysynda «Ardagerler týraly» Zańy qabyldandy.
Zań jobasynyń negizgi maqsaty – ardagerlerdi áleýmettik qorǵaýǵa baılanysty qoǵamdyq qatynastardy retteıtin zańnamalyq aktilerdi júıeleý, qaıta qaraý jáne ardagerlerdiń jańa sanattaryn qalyptastyrý.
Sonymen qatar, jalpy otyrysta «Qazaqstan Respýblıkasynyń keıbir zańnamalyq aktilerine áleýmettik qamsyzdandyrý máseleleri boıynsha ózgerister men tolyqtyrýlar engizý týraly» ilespe Zań eki oqylymda qaralyp, qabyldandy.
