Ardagerler týraly zań azamattar mártebesi turǵysynda ońtaıly nátıje beredi - Maıra Aısına

NUR-SULTAN. QazAqparat – «Ardagerler týraly» Zańnyń qabyldanýy ardagerler mártebesi turǵysynda ońtaıly nátıje beredi. Bul týraly Parlament Májilisiniń depýtaty Maıra Aısına málim etti, dep habarlaıdy QazAqparat tilshisi.

«Osyǵan deıingi shaqyrylymnyń depýtattary bul zań jobasyna kezinde bastamashylyq jasaǵan. Biraq, daǵdarys kezeńinde qarjy tapshylyǵyna baılanysty ótpedi. Sondyqtan bıyl «Ardagerler týraly» Zań talqylanyp, qabyldanǵanyna óz basym óte qýanyshtymyn. Sebebi, soǵys ardagerleriniń jáne basqa da azamattardyń mártebesin kóterý kerek. Sondyqtan bul baǵyttaǵy qadamdardy oń baǵalaımyn», - dedi Maıra Aısına.

Osy oraıda ol áleýmettik kómektiń zańnama aıasyndaǵy tártibi naqtalynǵanyn atap ótti.

Depýtattyń atap ótýinshe, Úkimetpen birlese júrgizilgen talqylaýlardan keıin, tıisti nátıjege qol jetkizildi. Sonymen qatar, bul baǵytta zańnamany jetildirý jumystary jalǵasyn tabatyn bolady.

Aıta keteıik, Memleket basshysy «Ardagerler týraly» Qazaqstan Respýblıkasynyń Zańyna qol qoıǵan bolatyn.

Budan buryn habarlanǵandaı, 30 sáýir kúni Parlament Senatynyń jalpy otyrysynda «Ardagerler týraly» Zańy qabyldandy.

Zań jobasynyń negizgi maqsaty – ardagerlerdi áleýmettik qorǵaýǵa baılanysty qoǵamdyq qatynastardy retteıtin zańnamalyq aktilerdi júıeleý, qaıta qaraý jáne ardagerlerdiń jańa sanattaryn qalyptastyrý.

Sonymen qatar, jalpy otyrysta «Qazaqstan Respýblıkasynyń keıbir zańnamalyq aktilerine áleýmettik qamsyzdandyrý máseleleri boıynsha ózgerister men tolyqtyrýlar engizý týraly» ilespe Zań eki oqylymda qaralyp, qabyldandy.

Ony ázirleý qajettiligi birqatar zańnamalyq aktilerdi «Ardagerler týraly» zań jobasyna sáıkes keltirýmen baılanysty. Negizgi jańa ózgerister áleýmettik tólemderge qatysty bolyp otyr.