Ardagerler «Taza Qazaqstan» naýqanyna qatysty
ShYMKENT. KAZINFORM - Shymkentte «Taza Qazaqstan» aktsııasynyń «Ónegeli urpaq» aptalyǵy bastalyp, kóptegen is sharalar uıymdastyrylýda. Búgingi is-sharada qalanyń tazalyǵyna ardagerler úles qosty.
Aǵa býyn ókilderi jas býynǵa úlgi kórsetti deýge bolady. Abaı saıabaǵyna jınalǵan belsendiler «Urpaqtar sabaqtastyǵy» ataýymen ata men nemereniń birlesip atqarǵan eńbegine kýá boldy.
Osyndaı úlgi men danalyqty dáriptep, keıingi jas urpaqtyń boıynda tabıǵatqa, qorshaǵan ortaǵa degen janashyrlyq, qamqorlyq sezimderin qalyptastyrý maqsatynda uıymdastyrylǵan bul is-sharaǵa qaladaǵy memleket jáne qoǵam qaıratkerleri, ardagerler keńesiniń músheleri qatysty.
– Óz qalamyzǵa qamqorlyqpen qaraý – ár azamattyń boryshy. «Taza Qazaqstan» aktsııasy aıasynda Shymkentte kóptegen is-sharalar uıymdastyrylýda. Búgin «Ónegeli urpaq» aptalyǵyna oraı nemerelerimizben birge saıabaqqa kelip, tazalyq jumystaryna qatysyp jatyrmyz. Ósip kele jatqan balalarymyzǵa, jastarǵa ónege úlgi bolsyn dep atsalysyp jatyrmyz. Al jastarymyz úlkenderge, qarııalarǵa, ardagerlerge kómek kórsetip, ıgi istermen aınalysýda. Osyǵan úlken alǵysymdy bildiremin, – Kenjehan Tólebaev.
350-deı adam qatysqan tazalyq jumysynda qarııalar men ardagerler erikti jastarǵa tazalaý, shópterdi orý, qoqystardy shyǵarý, aǵashtardy ákteý jumystaryna qol kómek berip, aqyldaryn aıtyp, jol kórsetti. Ásirese qarııalar osyndaı ıgi istiń Uly jeńis kúni qarsańynda ótkenine qýanyshty.
