Ardagerler kýrsanttar jasaǵan jertólede sarbaz botqasynyń dámin tatty - Qorǵanys mınıstrligi (FOTO)

ASTANA. QazAqparat - Almaty qalasynda Uly Otan soǵysyndaǵy Jeńistiń 70 jyldyǵy qarsańynda Qazaqstan Respýblıkasy Qorǵanys mınıstrligi Qurlyq áskerleri áskerı ınstıtýtynda Uly Otan soǵysynyń ardagerleri Ivan Pastıýk, Aleksandr Kolesnıkov jáne Vladımır Tıýrındermen kezdesý ótti, dep habarlady mod.gov.kz.

Áskerı ınstıtýttyń kýrsanttary sahnalanǵan baǵdarlama ázirlep, qazaqstandyqtar qatysqan soǵystyń shaıqastardan úzindiler kórsetip, áskerı ánderdi shyrqady. Dál osy kúni qazirgi Otan qorǵaýshylarymyzdyń ómiri men turmysyn kórýge nıet bildirgender úshin Qurlyq áskerleri áskerı ınstıtýtynyń esigi ashyq boldy. Bolashaq ofıtserler óz sheberlikterin áskerı iste ǵana kórsetip qoımaı, mýzykalyq shyǵarmashylyq salasyndaǵy jetistikterin jarııa etti. Dástúr boıynsha baǵdarlama sońynda ardagerlerge estelik syılyqtar tabys etildi. Budan basqa maıdangerlerge arnap jasalǵan jertólede túski as berildi. Ol jerde ardagerler sarbaz botqasynyń dámin tatyp, flıagalardan sımvolıkalyq «frontovoılaryn» kóterdi. Ardagerler kontsert úshin alǵystaryn aıtyp qana qoımaı, Qarýly Kúshterdiń bolashaq ofıtserlerine óz tilekterin jetkizdi.