«Ardagerler árqashan qurmetke laıyq!» - respýblıkalyq basylymdarǵa sholý
ASTANA. Mamyrdyń 8-i. /QazAqparat/ - Qazaq aqparat agenttigi respýblıkalyq basylymdarda mamyrdyń 8-i, senbi kúni shyqqan ózekti materıaldarǵa sholýdy usynady.
Búgin Mamyrdyń 8-i, senbi kúni jaryq kórgen respýblıkalyq basylymdardyń barlyǵy da Jeńistiń 65 jyldyq mereıtoıyna arnalǵan.
***
Keshe Memleket basshysy Nursultan Nazarbaev 7 mamyr - Otan qorǵaýshylar kúnine jáne Uly Jeńistiń 65 jyldyǵy qurmetine oraı «Otan qorǵaýshylar» monýmentine gúl shoǵyn qoıdy. Bul týrasynda «Egemen Qazaqstan» gazetiniń senbilik nómirinde jaryq kórgen «Máńgilik alaý. Óshpes dańq!» atty maqalada keńinen tarqatyla jazylǵan. Basylymnyń baıandaýynsha, gúl shoǵyn qoıý rásiminen keıin jınalǵan qaýym beıbitshilik pen óz eliniń erteńi úshin keýdesin ot pen oqqa tosyp, surapyl soǵysta qaza tapqan qazaqstandyq jaýyngerlerdi bir mınót únsizdikpen eske aldy. Odan soń elimizdiń memlekettik Ánurany oınaldy. Saltanatty shara Respýblıkalyq ulan sarbazdarynyń el Prezıdenti - Qazaqstan Qarýly Kúshteriniń Joǵarǵy Bas qolbasshysy Nursultan Nazarbaevtyń aldynda saltanatty sherý jasap ótýimen ári qaraı jalǵasty.
«Keshe Aqordada Prezıdent Nursultan Nazarbaev Otan qorǵaýshylar kúnine oraı birqatar soǵys ardagerlerin jáne áleýet qurylymdarynyń qyzmetkerlerin Qazaqstan Respýblıkasynyń memlekettik nagradalarymen marapattady. Áskerı pogondardy tabys etý rásimi rezıdentsııanyń «Altyn zalynda», memlekettik nagradalardy tabys etý rásimi «Mármár zalynda» ótti», dep jazady «Egemen Qazaqstan» gazeti. Maqalada Elbasynyń «biz sizderdi Uly Otan soǵysynyń 70, 75 jyldyqtarynda da kórgimiz keledi. Surapyl soǵysta 500-den astam azamatymyz Keńes Odaǵynyń Batyry atandy. Jaýdy jumylyp, birligimizben jeńdik. Qanquıly soǵys jyldarynda qazirgi Qazaqstan halqynyń myzǵymas birligi qalyptasty. Alasapyran zamanda taǵdyr toǵystyrǵan ult ókilderin qazaq jeri bir otbasynyń balasyndaı baýyryna basty. Biz el basyna túsken zulmat jyldardyń zildeı salmaǵyn jan júregimizben sezinip, bólistik. Sondyqtan biz adamzat balasyna orny tolmas qaıǵy-qasiret ákelgen sum soǵystyń jer betinde endi qaıtalanbaýyn tileımiz», degen sózi keltirilgen.
***
Kelesi bir qyzyqty maqala «Alash aınasy» gazetinde «Maıdandyq býhgalterııa» degen taqyryppen berilipti. Onda Keńes armııasy jaýyngerleriniń, ofıtserleriniń soǵys barysyndaǵy aılyq jalaqylary, syıaqylary tóńireginde tereńirek jazylǵan. Máselen, basylymnyń jazýynsha, atyp túsirilgen jaý ushaǵyna - 1000 som, sátti bombalaýǵa - 1500 somnan joǵary, jaý aerodromdaryn talqandaǵany úshin 5000 somǵa deıin syıaqy taǵaıyndalypty. Sonymen qatar kúndizgi jáne túndegi soǵys qımyldarynyń óz tarıfi bolǵan, al Berlınniń ortalyǵyn bombalaǵandarǵa syıaqy tórt ese artyq tólengen.
«Alash aınasy» gazetiniń «Dat!» aıdarynda Qazaqstannyń halyq jazýshysy, Uly Otan soǵysynyń ardageri Ázilhan Nurshaıyqovpen aradaǵy suhbat «Surapyl soǵysta qazaq jaýyngerleriniń eren erlikteri elenbeı qaldy» degen taqyryppen berilgen. Ekeýara áńgimeniń tolyq nusqasyn basylymnyń senbilik nómirinen egjeı-tegjeıli oqı alasyzdar.
***
«Keshe Almaty jáne Saryarqa aýdandarynyń ákimderi Sapar Ahmetov pen Sábıla Mustafına aýdan aýmaǵyndaǵy Uly Otan soǵysynyń ardagerlerine páter kiltin tapsyrdy», dep jazady «Astana aqshamy» gazeti. Basylymnyń atap ótýinshe, qonys toıyn toılaǵan ardagerlerdiń biri mılıtsııa úzdigi atanǵan Temirǵalı Ádilbekov, al ekinshisi uzaq jyldar boıy quqyq qorǵaý salasynda jemisti eńbek etken Muqan Balapanov boldy.
***
Keshe «Nur Otan» halyqtyq demokratııalyq partııasy Almaty qalalyq fılıaly Uly Otan soǵysynyń ardagerlerin qabyldady. Bul jaıynda «Aıqyn» gazetiniń senbilik nómirinde jaryq kórgen «Ardagerler árqashan qurmetke laıyq!» degen maqalada keńinen baıandalǵan. «Dál qazirgi kúni Almaty qalasynda 2360 soǵys ardageri men tyl «jaýyngerleri» ómir súrýde. Elbasy Nursultan Nazarbaevtyń usynysymen osydan eki jyl buryn qurylǵan Almatydaǵy Alataý aýdanynda jáne osyndaǵy Ójet aýylynda soǵys ardagerlerin máńgi ulyqtaý maqsatynda qos eskertkish boı kóterip, jeńiske qol jetkizgen qart jaýyngerler jas urpaqqa taǵlymdy estelikter aıtyp, óz oılaryn bólisken-di. Buǵan qosa, Alataý aýdanyndaǵy jańadan salynǵan jaıly úıden onnan astam soǵys ardageri páter alyp, qýanyshqa bólendi», dep jazady basylym.
«Aıqyn» gazetiniń dástúrli «Aq sóıle!» aıdarynyń búgingi qonaǵy - Qazaqstannyń halyq jazýshysy, Memlekettik syılyqtyń ıegeri Ázilhan Nurshaıyqov. Suhbat barysynda basylym tilshisiniń barlyq saýaldaryna tushymdy jaýap bergen ol «Aldaǵy arman-oıym: qazaq halqy ult sanatynda máńgi saqtalyp qalsa eken deımin. Táýelsiz Qazaqstan memleketiniń irgesi myzǵamas, berik bolsa eken deımin. Halqymyz tórt apattan: órtten, sý tasqynynan, soǵystan, zilzala qaýpinen aman bolsa eken dep tileımin. Buǵan qosa, keńbaıtaq qazaq elin óziniń syndarly saıasatymen dúnıejúziniń tórt buryshyna túgel moıyndata bilgen ultymyzdyń salıqaly hám erik-jigeri mol kóshbastaýshysy, ǵalamdyq deńgeıdegi tamasha saıasatker Nursultan Ábishuly Nazarbaev syndy baýyryma qajymas qaırat, zor densaýlyq bersin deımin. Kópultty elimizdiń bedeli bıik, mártebesi joǵary bolsyn! Bul - meniń eń basty tilegim, úlken armanym! Al kishi armanym, basylym betin kórmegen dúnıelerimdi kózim tirisinde kompıýterge bastyryp ketsem dep armandaımyn», depti
***
«Uly Jeńistiń 65 jyldyǵy qarsańynda Qazaqstan Respýblıkasynyń Reseı Federatsııasyndaǵy Tótenshe jáne Ókiletti Elshisi Zaýytbek Turysbekov Máskeýde turatyn qazaqstandyq soǵys ardagerlerimen kezdesti» dep jazady «Kazahstanskaıa pravda» gazeti. Elshi Qazaqstan Prezıdenti Nursultan Nazarbaevtyń atynan meımandardy Uly Jeńis kúnimen quttyqtap, barlyq qatysýshylarǵa rızashylyq jáne qurmet sózderin aıtqan. Osy rette ol qazaqstandyqtardyń ortaq Jeńiske qosqan úlesin erekshe atap kórsetken.
Sondaı-aq Qazaqstannyń Reseıdegi elshiligi «QazMunaıGaz» Ulttyq kompanııasynyń yqpalymen «Jeńis muragerleri» sharasy sheńberinde Astana men Máskeý qalalary arasynda telekópir uıymdastyrdy. Munda qazaqstandyq jáne reseılik ardagerler arada 65 jyl ótken soń bir-birimen júzdesýge múmkindik aldy.
