Ardagerdiń avtokóligin jóndep berdi

; ALMATY. Mamyrdyń 7-si. QazAqparat /Erbol Azanbek/ - Mereke qarsańynda Almatylyq máslıhat depýtaty Oleg Pechenık Uly Otan soǵysynyń ardageri Sergeı Bendıýkovtiń jeńil kóligin kúrdeli jóndeýden ótkizip berdi.

Búgin qaıta jańarǵan kólik ardagerge saltanatty jaǵdaıda tapsyryldy, dep habarlaıdy QazAqparat.

Uly Otan soǵysynyń ardagerine «Tavrııa» jeńil kóligi osydan 10 jyl buryn syıǵa tartylǵan eken. Sodan beri kólik oń aıaǵyn soǵysta oq julǵan múgedek-ardagerdiń eń jaqyn kómekshisine aınalǵan. Alaıda sońǵy 3 jyldan beri tozyǵy jetken «Tavrııa» buzylyp, ardager ary-beri júrýden qalǵan. Mereke qarsańynda qarııaǵa qalalyq máslıhat depýtaty habarlasyp, jańa kólik alyp berýdi usynǵan. Áıtse de ardager «eski dosyn» jóndep berýdi ótinipti. «Kóliktiń barlyq bóligi aýystyryldy. Qazir bundaı kólikter shyǵarylmaıtyn bolǵandyqtan qosalqy bólshekterin tabý qıynǵa soqty. Qıyndyqqa qaramastan ardagerge bergen ýádemizden bas tartpadyq. Qazir qarııanyń kóligi sý jańa deýge laıyq. Jóndeý jasaǵan mekeme 2 jylǵa kepildik berdi», deıdi ardagerge demýshilik tanytqan qalalyq máslıhattyń depýtaty Oleg Pechenık.

Bir qyzyǵy, 88 jasar ardager qarttyǵy men múgedektigine qaramastan áli kúnge deıin kólikti ózi júrgizedi. Búgingi sharadan soń da ol qaıta jasarǵan kóliginiń tizginin qolyna ustap, Almatynyń kóligi kóp kóshesine bet túzedi.