Ardager toǵyzqumalaqshylar ózara myqtyny anyqtady
QOSTANAI. QazAqparat - 25-29 qyrkúıek aralyǵynda Qostanaıda toǵyzqumalaqtan ardagerler arasynda Qazaqstan Respýblıkasynyń chempıonaty ótti, dep habarlaıdy QazAqparat HAA tilshisi.
Bul týrnır halyqaralyq talaı básekelerdiń jeńimpazdaryn tárbıelep shyǵarǵan bilikti jattyqtyrýshy, Qazaqstannyń bilim berý salasynyń úzdigi Ryspaı Úmbetovtiń qurmetine uıymdastyryldy. Qazaqstannyń 7 oblysynan 40 sportshy qatysty, olardyń arasynda birneshe sport sheberi jáne sport sheberine úmitkerler bar.
Bas tóreshi Batyrhan Ábilbekovtiń aıtýynsha, tórt kúnge sozylǵan zııatkerlik oıyn asa tartysty ótti. 
«Sońǵy 4 jylda Qostanaı oblysy ardagerler chempıonatyna qatysqan joq. Mine, bıyl respýblıkalyq aýqymdy týrnırdi ótkizip jatyrmyz. Sportshylardyń ishinde osaly joq. Máselen, byltyrǵy chempıonatta úzdik shyqqan ardagerler bıyl da baqtaryn synady», - dedi Batyrhan Ábilbekov.
Jarys toǵyzqumalaqtyń klassıka jáne blıts túrleri boıynsha ótti. Qatysýshylar tórt topqa bólinip oınady. Áıelder arasynda Gúljan Qılybaeva, Margarıta Parhomenko (ekeýi de - ShQO), Lázzat Janǵazınova (Pavlodar) jeńimpaz atandy. Erler synynda Appaz Bazarbaev (Qostanaı), Tólegen Júsipálıev (Aqtóbe), Jaras Isahanov (ShQO), Sálimjan Serikbaev (Qostanaı) óz toptarynda úzdik shyqty. 
«Chempıonat joǵary dárejede ótti. Toǵyzqumalaq oıynynyń jyl sanap damyp kele jatqany qýantady. Kelesi jyly da qatysýdy josparlap otyrmyn», - deıdi jarys jeńimpazy Margarıta Parhomenko.
