Árbir jumysshyǵa jaraqatyna saı ádil ótemaqy alýyna múmkindik jasalady - depýtat

ASTANA. KAZINFORM — Óndiristegi jazataıym oqıǵany tergeıtin komıssııanyń quramyna táýelsiz taraptar tartylady. Bul týraly Májilistiń jalpy otyrysynda jumysshylardyń quqyqtaryn qorǵaýǵa arnalǵan zań jobasyn birinshi oqylymda talqylaý kezinde depýtat Ashat Aımaǵambetov málim etti.

- Eńbek daýlary kezindegi jumyskerdiń múddesin qorǵaý taqyrybyna toqtalsaq, qazir óndiriste jazataıym oqıǵa bolsa, ony tergeıtin komıssııany jumys berýshiniń ózi qurady, basqarady. Sondyqtan kóp jaǵdaıda tergeý sýbektıvti ótip, jumysshy nemese onyń otbasy ádildik tappaı, senimsizdik paıda bolady. Sondyqtan biz tergeý protsesin obektıvti etý maqsatynda komıssııanyń quramyna táýelsiz taraptardy – medıatorlardy jáne onyń týystaryn nemese advokatyn qosýǵa múmkindik beremiz, - dedi A. Aımaǵambetov.

Onyń aıtýynsha, eger tergeý ashyq bolsa, oǵan birneshe tarap qatyssa, bul tergeý ádilirek ótip, qarapaıym jumysshynyń daýysy eskeriletin bolady.

Sonymen qatar depýtat óndiristik jaraqattyń dárejesin anyqtaý máselesine toqtaldy.

- Máselen, jumysshy jaraqat aldy deıik. Onyń qanshalyqty aýyr ekenin dárigerler qalaı anyqtaıdy? Sizder tań qalasyzdar, biraq dárigerler sonaý 1994 jylǵy, ıaǵnı eskirgen Ádistemelik usynymdardy paıdalanady. Al bul – zań da, normatıvtik akti de emes! Problema nede? Naqty, biryńǵaı standart joq.

Bir jaraqatty bir qalada «aýyr» dese, ekinshisinde «jeńil» dep baǵalaı salýy múmkin. Al jaralanǵan sol jumysshynyń alatyn ótemaqysynyń mólsheri dál osy medıtsınalyq qorytyndyǵa tikeleı baılanysty. Sheshý joldary qandaı? Bul quqyqtyq olqylyqty endi joıamyz. Densaýlyq saqtaý mınıstrligine óndiristik jaraqattyń dárejesin anyqtaıtyn naqty ári biryńǵaı qaǵıdalardy bekitý quzyretin beremiz. Frantsııa, Kanada sııaqty elderde bul áldeqashan standartqa keltirilgen suraq. Nátıjesinde daý-damaı azaıyp, árbir jumysshy jaraqatyna saı ádil ótemaqy alýyna múmkindik bolady, - dedi Ashat Aımaǵambetov.

Buǵan deıin habarlanǵandaı, Májilistiń jalpy otyrysynda kóptegen jumys berýshiler áleýmettik kepildikterden jaltaryp júrgeni aıtyldy.