Árbir jetinshi oqýshy kún saıyn tátti gazdalǵan sýsyn ishken
ASTANA. KAZINFORM — 2026 jyldyń birinshi jartyjyldyǵynda mektep jasyndaǵy balalardy profılaktıkalyq tekserý barysynda karıes aýrýynyń 80 169 jaǵdaıy anyqtaldy.
Tisjegi profılaktıkasy jáne densaýlyqqa paıdaly ádetterdi qalyptastyrý máseleleri «Salamatty mektep» respýblıkalyq forýmynda talqylandy.
2022 jylǵy HBSC zertteýiniń derekterine sáıkes 11, 13 jáne 15 jastaǵy mektep oqýshylarynyń 14,4%-y kún saıyn quramynda qanty bar gazdalǵan sýsyndar ishken. Bul – shamamen árbir jetinshi oqýshy. Saýalnamaǵa qatysqandardyń 66,6%-y mundaı sýsyndardy aptasyna keminde bir ret tutynǵan.
Sonymen qatar zertteýge qatysýshylardyń tek 47,7%-y tisterin kúnine eki ret nemese odan da jıi tazalaǵan.
2026 jyldyń birinshi jartyjyldyǵynda mektep jasyndaǵy balalardy profılaktıkalyq tekserý barysynda karıes aýrýynyń 80 169 jaǵdaıy anyqtaldy.
Erkin qanttardy jıi tutyný – karıes damýynyń negizgi taǵamdyq faktorlarynyń biri. Sondyqtan profılaktıka tek stomatologqa barýmen shektelmeıdi. Ol kúndelikti qalyptasatyn ádetterden turady: aýyz qýysynyń turaqty gıgıenasy, tátti sýsyndar men quramynda qanty kóp ónimderdi az tutyný, aýyzsýǵa qoljetimdilikti qamtamasyz etý jáne medıtsınalyq kómekke ýaqtyly júginý.
2025 jylǵy 1 qyrkúıekten bastap bilim berý uıymdarynda jańartylǵan Tamaqtaný standarty qoldanysqa engizildi. Standart taǵam quramyndaǵy qant mólsherin azaıtýdy kózdeıdi. Al tátti sýsyndardyń ornyna sý, sút, qyshqyl sút ónimderinen jasalǵan sýsyndar jáne qant mólsheri tómendetilgen sýsyndar usynylady.
Sondyqtan «Salamatty mektep» aıasynda durys tamaqtaný men balalarǵa densaýlyq máseleleri boıynsha bilim berý jeke profılaktıkalyq is-sharalar retinde emes, biryńǵaı mektep ortasynyń quramdas bóligi retinde qarastyrylady.
Kelesi qadam – mektepterde qandaı jaǵdaılar jasalǵanyn turaqty túrde baǵalap, alynǵan derekterdi naqty jaqsartýlar úshin paıdalaný.
Salaýatty ádet kún saıyn qalyptasady. Al mektep – bul ádetterdiń bala ómiriniń ajyramas bóligine aınalýyna yqpal etetin negizgi oryndardyń biri.
Aıta ketelik Aqmaral Álnazarova balalar stomatologııasyndaǵy kezek máselesin sheshýdi talap etken edi.
