Árbir jańa memlekettik qyzmet kórsetý eń áýeli tsıfrlyq formatta jasaqtalýǵa tıis – Prezıdent

ASTANA. KAZINFORM – Prezıdent tsıfrlandyrý jáne neırojelini keńinen qoldaný Qazaqstannyń memlekettik basqarý júıesiniń jańa fılosofııasyna aınalýǵa tıis ekenin aıtty. Bul týraly Aqordanyń baspasóz qyzmeti habarlady.  

— Árbir jańa memlekettik qyzmet kórsetý eń áýeli tsıfrlyq formatta jasaqtalýǵa tıis. Buryn usynylǵan málimetterdi qaıta suratýdyń keregi joq. Budan bólek, memleket pen azamattardyń qarym-qatynasyna baılanysty barlyq normatıvtik aktiler bekitilgenge deıin mindetti túrde tsıfrlyq saraptamadan ótkizilýi qajet. Sonyń nátıjesinde azamattar men kásipkerler bıýrokratııadan qutylyp, olardyń memlekettik ınstıtýttarǵa degen senimi nyǵaıa túsedi.

Jalpy, aıtylǵan barlyq shara bizdiń aımaqta jańashyldyq sanalady. Bul elimizdiń tsıfrlyq saıasatynyń uzaq merzimdi ári júıeli baǵytyn kórsetedi. Aqyldy tehnologııalar úlken derekterdi óńdeýge, áleýmettik saladan bastap negizgi ekonomıkalyq kórsetkishterge deıingi kóptegen salany taldaýǵa qabiletti. Strategııalyq josparlaýdyń tıimdiligin aıtarlyqtaı jetildiredi, — dedi Prezıdent.

Sáıkesinshe, azamattardyń ál-aýqatyn jaqsartýǵa jáne ekonomıkalyq ósimdi arttyrýǵa yqpal etedi. Sonymen qatar halyq nesıe berýden bastap memlekettik qyzmet kórsetýge deıingi algorıtm júıeleriniń qalaı jumys isteıtinin bilýi ári túsinýi kerek.

— Jasandy ıntellekt tehnologııasyn ekonomıkanyń barlyq salasyna jappaı engizý úshin tıisti zańnamany da soǵan sáıkes beıimdeý qajet. Bul — elimizdiń tsıfrlyq jáne zııatkerlik derbestigin qorǵaıtyn naqty tetikter bolý kerek degen sóz. Túptep kelgende, tsıfrlandyrý jáne neırojelini keńinen qoldaný Qazaqstannyń memlekettik basqarý júıesiniń jańa fılosofııasyna aınalýǵa tıis, — dedi ol. 

Aıta ketelik Memleket basshysy forým ataýyn AI Bridge dep ózgertýdi usynǵan edi.