Árbir úshinshi adam jyldamdyqty shekten tys asyrý saldarynan mert bolady - polıtsııa

ASTANA. KAZINFORM – Qazaqstanda jol-kólik oqıǵalarynyń sany artqan. Bul týraly «Jibek joly» telearnasyndaǵy «Búgin LIVE» baǵdarlamasynda Ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranova málim etti.

Onyń aıtýynsha, jol apattarynyń statıstıkadaǵy ósimi jańa tártipke baılanysty. Buǵan deıin jol-kólik oqıǵasy tek medıtsınalyq saraptamadan keıin tirkelgen bolsa, qazirgi tańda barlyq apattar, onyń ishinde usaq kólik qaqtyǵystary da esepke alynady.

– Megapolısterde tirkelgen apattar sany kóp bolǵanymen, adam shyǵyny kóbine Almaty, Jambyl jáne Túrkistan oblystarynda oryn alady. Ásirese qala syrtyndaǵy joldarda qazaǵa ákelgen jaǵdaılar jıi kezdesedi. Barlyq qaıǵyly oqıǵalardyń shamamen 60 paıyzy respýblıkalyq tas joldarynda tirkelgen. Onyń basty sebebi – kólik aǵyny men jolaýshylar sanynyń kóptigi, – dedi ol.

Sonymen qatar polıtsııa ókili jol erejesin saqtamaý negizgi faktor ekenin atap ótti. Ásirese jyldamdyqty asyrý, qarsy baǵytqa shyǵyp ketý, baǵdarshamnyń tyıym salynǵan belgisine ótý jáne jaıaý júrginshilerge jol bermeý jaǵdaılary apatqa ákeledi.

– Árbir úshinshi adam jyldamdyqty shekten tys asyrý saldarynan qaza tabýda. Buǵan qosa búginde júrgizýshilerdiń uıaly telefonǵa alańdaýy da qaýipsizdikke qater tóndirip otyr, – dedi Aqtoty Boranova.

Eske sala keteıik, 2025 jyldyń alǵashqy jartyjyldyǵynda elimizde 15 698 jol-kólik oqıǵasy (JKO) tirkeldi. Bul kórsetkish ótken jyldyń sáıkes kezeńimen salystyrǵanda 54 paıyzǵa artyq.