Árbir otbasynyń ál-aýqaty aı saıyn tekseriledi: Járdemaqy qalaı ózgeredi
ASTANA. KAZINFORM — Endi otbasynyń ál-aýqat sanaty aı saıyn qaıta qaralady. Eger úıdiń qarjylyq jaǵdaıy ózgerse, júıe ony avtomatty túrde basqa sanatqa aýystyra alady. Bul týraly Eńbek jáne halyqty áleýmettik qorǵaý mınıstri Asqarbek Ertaev aıtyp berdi.
Mınıstrdiń aıtýynsha, qazir Otbasynyń tsıfrlyq kartasynda 6,2 mln úı sharýashylyǵy týraly málimet bar. Júıe 30 memlekettik aqparattyq júıedegi derekterdi paıdalanyp, árbir otbasynyń ál-aýqat deńgeıin avtomatty túrde anyqtaıdy.
Barlyq málimetter kún saıyn jańartylyp otyrady. Soǵan sáıkes otbasylardy A, V, S, D jáne E sanattaryna bólý aı saıyn qaıta qaralady.
Al otbasynyń tabysy azaısa nemese materıaldyq jaǵdaıy jaqsarsa, júıe onyń sanatyn da ózgerte alady.
— Mysaly, qazan aıynda úı sharýashylyǵy V sanatynda bolsa, biraq belgili bir áleýmettik syn-qaterge baılanysty jaǵdaıy nasharlasa, kelesi aıda avtomatty túrde S sanatyna aýysýy múmkin. Muny túsiný mańyzdy: sanat birjolata berilmeıdi. Júıe árbir úıdiń jaǵdaıyn avtomatty túrde jańartyp, ózekti málimetterdi usynyp otyrady, — dedi mınıstr.
Aıta keteıik, qazaqstandyqtar eGov portaly men eGov Mobile qosymshasy arqyly otbasynyń ál-aýqat deńgeıin aldyn ala baǵalap, qaı sanatqa jatýy múmkin ekenin bile alady.
Eńbek jáne halyqty áleýmettik qorǵaý mınıstri Asqarbek Ertaev otbasynyń ál-aýqatyn baǵalaıtyn onlaın-kalkýlıator arqyly óz otbasyn tekserip kórdi. Nátıjesinde onyń otbasy V sanatyna jatqyzyldy.
Balasy 1,5 jasqa tolmaı jumysqa shyqqan analardyń járdemaqysy saqtalady.
