Árbir oblys pen aýdanda jańa nysandar salynady — Memleket basshysy
ASTANA. KAZINFORM — Memleket basshysy Qasym-Jomart Toqaev Táýelsizdik saraıynda ótken brıfıngte Qazaqstandy úlken qurylys alańyna aınaldyrý jospary aıasynda óńirlerde jańa nysandar salynatynyn aıtty.
Bıyl 30 maýsymda Parlament palatalarynyń birlesken otyrysynda Memleket basshysy Qazaqstandy úlken qurylys alańyna aınaldyrý tapsyrmasyn bergen edi.
Qasym-Jomart Toqaev bul baǵytta memlekettiń úlken jospary baryn atap ótti.
— Osyǵan deıin aıtqanymdaı, Qazaqstan úlken qurylys alańyna aınalýy kerek. Ár oblys ortalyǵynda nemese aýdandar men qalalarda iri qurylystar júrgiziledi. Emhanalar, balalarǵa arnalǵan ońaltý ortalyqtary, basqa da nysandar salynady. Astanada jańa kópir, Dombyra saraıy, Sý resýrstaryn zertteý ortalyǵy sekildi mańyzdy nysandar boı kóteredi. Qalalardy abattandyrý kerek. «Taza Qazaqstan» aktsııasyn oıdaǵydaı jalǵastyrý qajet. Sondyqtan qol qýsyryp otyrýǵa bolmaıdy. Bárimiz bir el bolyp iske kiriskenimiz jón. Bizdiń Qazaqstannan basqa Otanymyz joq, Otan úshin bárimiz kúsh salýymyz kerek, — dedi Prezıdent.
Qasym-Jomart Toqaev jalpy saıası naýqan jaqsy ótkenin, jurt aldyna jańa tulǵalar shyǵyp, utymdy ıdeıalar aıtylǵanyn málimdedi.
— Bul Quryltaı elimizdiń damýyna tyń serpin beredi dep oılaımyn, — dedi Memleket basshysy.
Aıta keteıik, búgin elimizdiń barlyq óńirinde Quryltaı depýtattaryn saılaý bastaldy. Daýys berý 10 423 saılaý ýchaskesinde ótedi.
Memleket basshysy Qasym-Jomart Toqaev Táýelsizdik saraıynda ornalasqan № 520 saılaý ýchaskesinde daýys berdi.
Buǵan deıin Prezıdent «Vıtse-prezıdent kim bolady?» degen suraqqa jaýap bergen edi.
