Árbir basshy jumys tásiline de, ózine de jańasha kózqaraspen qaraýǵa tıis - Bektenov
ASTANA. KAZINFORM – Memlekettik kepildik esebinen qarjylandyrý josparlanǵan avtojol jobalary boıynsha qujattamany súıemeldeý protsesi baıaý júrip jatyr. Bul týraly búgin Úkimet otyrysynda Premer-mınıstr Oljas Bektenov aıtty.
- Bıyl naýryz aıynda 2026 jyly Ekonomıkalyq ósýdi qamtamasyz etý máseleleri jónindegi keńeste biz ekonomıkanyń ósý rezervterin yntalandyrýǵa baǵyttalǵan tıisti sharalardy maquldadyq. Alaıda keıbir máseleler sozylyp ketti. Bul «Báıterek» holdıngin kapıtaldandyrýǵa jáne turǵyn úıge ınjenerlik-kommýnıkatsııalyq ınfraqurylym tartý úshin ákimdikterdiń memlekettik baǵaly qaǵazdardy shyǵarýy jónindegi sharalarǵa qatysty. Sondaı-aq memlekettik kepildik esebinen qarjylandyrý josparlanǵan avtojol jobalary boıynsha qujattamany súıemeldeý protsesi baıaý júrip jatyr. Ekonomıkanyń basym salalarynda qosylǵan qundy arttyratyn ınvestıtsııalyq jobalardy anyqtaý jumysynyń da tıimdiligi tómen, - dedi Úkimet basshysy.
Premer-mınıstr osy máselelerdiń bárin jedel sheshý kerektigin basa aıtty.
- Árbir basshyǵa salalar boıynsha ósýdiń josparly kórsetkishterine qol jetkizý úshin tikeleı jaýapkershilik júktelgen. Osyny taǵy da esterińizge salamyn. Konstıtýtsııanyń qabyldanýymen elimiz damýdyń jańa kezeńine qadam basady. Bul oraıda, memlekettik apparatqa, birinshi kezekte basshylarǵa jańa talaptar qoıylady. Árbir basshy óziniń jumys tásiline de, ózine de túbegeıli jańasha kózqaraspen qaraýǵa tıis. Ol Memleket basshysy aıqyndaǵan jańa talaptarǵa, jańǵyrýdyń jańa jalpyulttyq kún tártibine sáıkes kele me? Árbir basshydan naqty nátıje bolýǵa tıis. Buny esten shyǵarmańyzdar, - dedi Oljas Bektenov.
Buǵan deıin Oljas Bektenov birqatar naryqta monopolııaǵa qarsy baqylaýdy kúsheıtýdi tapsyrǵan edi.
