Árbir aýyl men qala tazalyqtyń úlgisi bolýy qajet – Prezıdent
ASTANA. KAZINFORM – Memleket basshysy Qasym-Jomart Toqaev elordada máslıhat depýtattarynyń ІІ respýblıkalyq forýmynda qoǵamda tazalyq mádenıeti ornyǵýy qajet ekenin atap ótti.
«Mańyzdy qundylyqtyń biri – týǵan elge janashyrlyq. Ózderińizge málim, men ekologııa máselesine aıryqsha mán beremin. Qoǵamda tazalyq mádenıeti ornyǵýy qajet. Osyǵan oraı, bıyl elimizde «Taza Qazaqstan» jobasy qolǵa alyndy. Bul – óte mańyzdy bastama. Aımaqtarda aýqymdy ekologııalyq sharalar atqarylyp jatyr. Jumystyń nátıjesi qazirdiń ózinde aıqyn kórine bastady. Shetelden kelgen qonaqtar eldi mekenderimizdiń erekshe tazalyǵyna nazar aýdaryp jatyr. Tipti, muny basqa jurtqa úlgi etip, áleýmettik jelige jarııalap júrgen týrıster bar. Árıne, sheteldikterdiń maqtaǵany jaqsy. Biraq tazalyq ózgelerden buryn ózimizge kerek. Bul – Jarlyqpen jasalatyn, Ókimmen oryndalatyn sharýa emes», - dedi Prezıdent.
Memleket basshysy «Taza Qazaqstan» sharasy jyl on eki aı boıy jalǵasýǵa tıis ekenin aıtty.Bul is-sharadan bir de bir eldi meken shet qalmaýy kerek.
«Tazalyq aldymen halqymyzdyń ádetine, sosyn qanǵa sińgen qasıetine aınalýy qajet. Shyn máninde, órkenıetti eldiń basty sıpatynyń biri – tazalyq pen tártip. Sondyqtan «Taza Qazaqstan» sharasy jyl on eki aı boıy jalǵasýǵa tıis. Sizder ár qıyrdaǵy aýyl-aýdandardan kelip otyrsyzdar. Osy sátti paıdalanyp, barshańyzdy «Taza Qazaqstandy» tutas el bolyp qoldaýǵa shaqyramyn. Bul is-sharadan bir de bir eldi meken shet qalmaýy kerek. Árbir aýyl, árbir qala tazalyqtyń úlgisi bolýy qajet. Jalpy, bizdiń elimizde Zań jáne Tártip ústemdik qurýǵa tıis. Sonda ǵana reformalardy tabysty júzege asyrýǵa jáne el ekonomıkasyna ınvestıtsııa tartýǵa bolady. Zań jáne Tártip – Ádiletti Qazaqstannyń myzǵymas tuǵyry. Kez kelgen qoǵam ádildik bolǵanyn qalaıdy. Qazaqstan halqynyń da talaby – osy. Sondyqtan men ádildik qaǵıdatyn ornyqtyrýǵa bar kúsh-jigerimdi salamyn», - dedi Qasym-Jomart Toqaev.
Aıta keteıik, elordada AMANAT partııasynyń máslıhat depýtattarynyń forýmy bastaldy. Sharaǵa Memleket basshysy Qasym-Jomart Toqaev qatysyp jatyr.
