Árbir ana men sábıdiń ómiri qymbat — Berik Ýálı
SEMEI. KAZINFORM – Oblys ákimi Berik Ýálı Almaty kópsalaly klınıkalyq aýrýhanasynyń dárigerlerine alǵys aıtty.
Oblys ákimi Berik Ýálı óńir turǵynynyń ómirin saqtap qalǵan Almaty kópsalaly klınıkalyq aýrýhanasynyń ujymyna olardyń kásibı sheberligi men jankeshti eńbegi úshin rızashylyǵyn bildirdi.
Júktiliktiń 28-aptasynda bolǵan oblys turǵyny gemorragııalyq shok dıagnozymen asa aýyr jaǵdaıda atalǵan aýrýhanaǵa jetkizilgen. Dárigerler shuǵyl ota jasap, naýqasqa der kezinde búırek qyzmetin kórsetetin apparatty («jasandy búırek») qosqan.
Medıtsına qyzmetkerleriniń úılesimdi jáne bilikti áreketiniń arqasynda patsıenttiń jaǵdaıy qalypqa keltirilgen. Qazir ol jansaqtaý bóliminen tıisti mamandandyrylǵan bólimshege aýystyryldy.
Aımaq basshysy dárigerlerdiń kásibı birligi men zamanaýı tehnologııalardyń arqasynda patsıenttiń ómirin saqtap qalý múmkin bolǵanyn atap ótti.
— Ana men balanyń ómirin saqtaý — memleketimizdiń basym baǵyttarynyń biri. Muny Prezıdentimiz únemi aıtyp keledi. Biz úshin árbir ana men sábıdiń ómiri qymbat. Ózimniń jáne Abaı oblysy turǵyndarynyń atynan Almaty kópsalaly klınıkalyq aýrýhanasynyń ujymyna alǵysymdy aıtamyn, — dedi oblys ákimi.
Aıta ketelik BQO-da dári-dármekpen qamtýda zań buzýǵa jol bergen 8 qyzmetker jaýapqa tartyldy.