Árbir turǵynǵa kómek kedergisiz jetýi tıis – Berdibek Saparbaev

TARAZ. QazAqparat – Jambyl oblysy ákimdiginde ótken keńeste Memleket basshysy Qasym-Jomart Toqaevtyń halyqty qoldaýdyń qosymsha sharalary boıynsha júktegen mindettemelerin júzege asyrý barysy talqylandy, dep habarlaıdy QazAqparat oblys ákiminiń baspasóz qyzmetine silteme jasap.

Qasym-Jomart Toqaev óz málimdesinde jergilikti atqarýshy organdarǵa shuǵyl túrde júzege asyrylýy qajet birqatar mindetter júktegen bolatyn. Oblys ákimi Berdibek Saparbaev olardyń árqaısysyn nazarǵa alyp, salalyq basqarmalarǵa naqty tapsyrmalar joldady.

Birinshi kezekte pandemııaǵa qarsy kúreste aldynǵy shepte júrgen dárigerler men medıtsına qyzmetkerlerin qosymsha qoldaý úshin tıisti esepteýler sharalaryn júrgizý qajet. Sonymen qatar, aımaq basshysy azamattardyń, onyń ishinde tegin azyq-túlik úlestiriletin múmkindigi shekteýli azamattardyń tizimin jasaýdy mindettedi.

Sondaı-aq halyq arasynda 1 shildege deıin MÁMS júıesinde saqtandyrylmaǵan azamattardyń medıtsınalyq kómek alý quqyǵy uzartylǵandyǵy týraly túsindirý jumystaryn júrgizý kerek. Al shaǵyn jáne orta bıznes ókilderi 6 aıǵa eńbekaqy tóleý qorynan ustalatyn salyqtan bosatylady.

Berdibek Saparbaev kóktemgi dala jumystarynyń oryndalý barysy jergilikti bıliktiń aıryqsha baqylaýynda ekendigin jetkizdi. Bul jumystarǵa Respýblıkalyq bıýdjetten 70 mıllıard teńge bólingen. Al qaryz alýshylar úshin 5% - dan aspaıtyn mólsherleme belgilengen. Bul oraıda aýdan ákimderi memleket kómegin tıimdi paıdalaný úshin fermerler arasynda jan-jaqty túsindirý jumystaryn júrgizý qajet. Sonymen qatar, shaǵyn jáne orta sharýa qojalyqtaryn qoldaý maqsatynda Memleket basshysynyń tapsyrmasymen «Qarapaıym zattar ekonomıkasy» baǵdarlamasy aıasynda qosymsha 100 mıllıard teńge bólinip otyr.

Aımaq basshysy atap ótkendeı, aýyl sharýashylyǵy taýar óndirýshileri úshin dızel otynynyń qunyn lıtrine 165 teńgege deıin nemese naryqtyq baǵadan 15 paıyzǵa arzandatý týraly Prezıdenttiń tapsyrmasyn oryndaý boıynsha baqylaýshy organdardyń jumysyn kúsheıtiledi.

- Memleket basshysynyń tapsyrmalary ýaqytyly ári nátıjeli oryndalýy tıis. Eń bastysy – qarapaıym turǵyndar ózderiniń memlekettiń qamqorlyǵynda ekendigin sezinýleri kerek. Búginde azyq-túlik qaýipsizdigin qamtamasyz etý úshin ár bir kúnniń mańyzdylyǵyn eskergen durys, - dep atap ótti aımaq basshysy.

Sondaı-aq, Berdibek Saparbaev túsindirý jumystarynyń álsiz júrgizilý saldarynan memleket tarapynan qabyldanǵan qoldaý kórsetý sharalarynan turǵyndardyń habarsyz ekendigin alǵa tartyp, bul máseleniń tótenshe jaǵdaı rejımi kezindegi ózektiligin basa aıtty.

- Kómek árbir tıisti turǵynǵa jetýi kerek. Memlekettik organdar óz jumysyn sapaly oryndap, al bólingen qarajatqa turǵyndar ýaqytyly ári kedergisiz qol jetkizýi tıis, - dep atap ótti oblys ákimi.