Árbir tórtinshi sırııalyq kómekke muqtaj
ASTANA. 18 qańtar. QazAqparat - Daǵdarys jaılaǵan Sırııadan qashqan bosqyndardyń jartysynan astamy - balalar.
Bul týraly Birikken Ulttar Uıymynyń osy aımaqtaǵy bosqyndar isi jónindegi úılestirýshisi Panos Momtzıs málimdedi.
Nıý-Iorkte Beıbitshilik jónindegi halyqaralyq ýnıversıtette baıandama jasaǵan Panos Momtzıs: «Sırııa halqynyń árbir tórtinshi turǵynyna kómek kerek. Bul kórsetkish odan saıyn óse me dep qaýiptenemin», - dedi.
Muslim.kz saıtynyń jazýynsha, BUU sarapshylary Sırııadan kún saıyn 3 myń adamnyń shekara asyp, bosqynǵa aınalatynyn anyqtaǵan. Dál qazir halyqaralyq uıym 650 myń sırııalyq bosqyndy resmı tirkeýine alǵan. Al jarty jyldan soń bul kórsetkish eki esege artýy múmkin kórinedi.
BUU ókilderi Kýveıtte 30 qańtarda ótetin donorlar konferentsııasy kezinde sırııalyqtarǵa qarjylaı kómek retinde 1,5 mıllıard dollar jınalatyn shyǵar dep úmittenip otyr.
