Árbir sýdıaǵa qoıylatyn talaptar barynsha kúsheıtildi - Joǵarǵy Sot tóraǵasy
ASTANA. 18 qańtar. QazAqparat /Rýslan Ǵabbasov/ - Árbir sýdıaǵa qoıylatyn talaptar barynsha kúsheıtildi. Bul týraly búgin QR Parlamenti Senatynyń jalpy otyrysynda QR Joǵarǵy Sotynyń tóraǵasy Bektas Beknazarov málim etti.
«Jumys júktemesi joǵary óńirlerge sýdıalardyń sanyn kóbeıtýge, al kerisinshe jumys júktemesi tómen jerlerde sýdıalardyń sanyn azaıtý tetigi qoldanylyp otyr. Árıne, búginde Qazaqstan boıynsha árbir 100 myń halyqqa shaqqanda sýdıalardyń sany kóptegen memleketterge qaraǵanda tómen», - dedi B. Beknazarov.
Osy oraıda, ol 2010 jyly memlekettik qyzmetkerlerdiń sanyn ońtaılandyrý baǵytynda respýblıka boıynsha sýdıalardyń sany 378 birlikke qysqarǵanyn jekizdi.
«Soǵan qaramastan, qazirgi sot korpýsy 2011 jyly jumys kórsetkishteri boıynsha, ıaǵnı negizgi parametrler aıasynda jumystyń dárejesin sol deńgeıde ustap otyrdy. Biz qazir bul másele boıynsha árbir sýdıaǵa qoıylatyn tártipti, sondaı-aq sot tóraǵalaryna qoıylatyn talaptardy barynsha kúsheıtip, qazirgi júkteme turǵysynda jumystardy atqarýdy júktep otyrmyz»,-dedi B. Beknazarov
«Búginde memlekettiń tarapynan olar óz jumysyn taza ári sapaly isteýge barlyq qadamdar jasaldy. Jalpy aıtqanda, Qazaqstandaǵy sot júıesi álemdik standarttarǵa barlyq parametrlermen sáıkes keldi. Biz sot júıesin reformalaýda kóptegen memleketterden aldyńǵy qatarly oryndarda kele jatyrmyz»,-dep túıindedi tóraǵa.
