Árbir sheneýnik halyq úshin jumys isteıtinimizdi umytpaýy kerek - QR Prezıdenti

NUR-SULTAN. QazAqparat - Árbir sheneýnik halyq úshin jumys isteıtindigimizdi este ustaýy tıis. Bul týraly búgin Aqordada birqatar azamatqa memlekettik nagradalardy tapsyrý barysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi

.

«Biz bıýdjet qyzmetkerleriniń eńbekaqysyn birtindep arttyryp kelemiz. Bul ustazdar qaýymyna, dárigerlerge jáne mádenıet salasy mamandaryna qatysty. Mysaly, kelesi jyldan bastap muǵalimderdiń jalaqysy 25 paıyzǵa ósedi, al jalpy 4 jyl ishinde olardyń jalaqysy 2 esege artady. Kópbalaly otbasylar, zeınetkerler, múmkindigi shekteýli jandar árdaıym memlekettiń qamqorlyǵynda bolady. Biz áleýmettik memleket ekenimizdi eshqashan esten shyǵarmaımyz», - dedi Qazaqstan Prezıdenti.

Memleket basshysynyń atap ótýinshe, ózgege qoldaý kórsetip, qol ushyn berý, kómektesý - halqymyzdyń qanyna sińgen qasıet. Bul - bizdiń ulttyq kodymyzda bar nárse.

«Árbir sheneýnik bizdiń halyqtyń bólshegi ekendigimizdi, halyq úshin jáne halyqtyń arasynda jumys isteıtindigimizdi este ustaýy tıis. Estıtin memleket – bul bıýrokratııanyń eń nashar kórinisteriniń de bolmaýy jáne tsıfrlandyrý negizinde barlyq protsedýralardyń ashyqtyǵy. Memlekettik bılik júıesine basqarýshylardyń jańa tolqynyn tartý qajet», - dedi Qasym-Jomart Toqaev.

Qasym-Jomart Kemeluly bul baǵytta alǵashqy qadamnyń jasalyp, prezıdenttik jastar kadr rezervi jasaqtalyp jatqanyn eske saldy.

«Jas kásibı mamandar memlekettik basqarý júıesiniń jaýapty ýchaskelerine jiberiledi», - dedi Memleket basshysy.