Árbir otbasyda mańyzdy qujattar bar, olardy saqtaý kerek - M. Jaqypov
ASTANA. QazAqparat - Qazaqstan halqynyń otbasylyq muraǵattary memlekettik muraǵattar úshin paıdaly bolýy múmkin. Búgin Astanadaǵy Halyqaralyq muraǵattar keńesi Eýro-Azıattyq aımaqtyq bóliminiń 15-shi Jalpy konferentsııasynda QR Prezıdent Ákimshiliginiń Jalpy bóliminiń meńgerýshisi Mirbolat Jaqypov qazaqstandyqtardy otbasylyq qujattardy saqtaýǵa shaqyrdy.
«Bizdiń qazaqstandyq muraǵattar júıesi jaqsy qarqynmen damyp kele jatyr. Bul baǵytta memlekettik muraǵattardyń jańa ǵımarattary salynyp jatyr, sondaı-aq olar aldyńǵy qatarly tehnologııalarmen jabdyqtalady. Memlekettegi eń qundy qujattar jaqsy jaǵdaıda saqtalýy tıis», -dedi ol.
Munymen qosa, M. Jaqypov qazaqstandyqtarǵa muraǵat máselesi boıynsha óz usynysyn bildirdi. «Árbir otbasyda mańyzdy qujattar bar, ıaǵnı ózindik qundylyǵymen erekshelenetin fotosýretter, beıne materıaldar saqtalǵan. Ulttyq muraǵat qory tek memlekettik mańyzy bar qujattarmen ǵana emes, sonymen qatar ár otbasynyń mańyzdy qujattaryn qamtıdy. Sondyqtan da osy qujattardy saqtaý kerek. Memlekettik árbir muraǵatta qazirgi kezde jeke qorlar qurylǵan. Onda biz birinshi kezekte tanymal otandastarymyzdyń, ulttyq aýqymdaǵy qaıratkerlerdiń materıaldary men qujattaryn jınap jatyrmyz. Ony olardyń otbasy músheleri ákelip tapsyryp otyr. Bul qujattar otbasylardyń menshigi bolyp qala beredi. Eń mańyzdysy - bul materıaldar muraǵatta jaqsy saqtalady. Sonymen qatar, saqtandyrý qoryn da quramyz»,-dedi M. Jaqypov.
Aıta keteıik, búgingi Jalpy konferentsııaǵa TMD elderiniń memlekettik muraǵat qyzmetteriniń basshylary men ǵalymdar, halyqaralyq uıymdardyń ókilderi keldi. Olar asa qundy qujattardy saqtaý, tájirıbe almasý, salada sońǵy býyndy tehnolgııalardy engizý máselelerin talqylaýda.
